انجری سے دوچار آسٹریلیا نیتھن ایلس کی قیادت میں ورلڈ کپ جیتنے کے لیے پرامید

انجری کے مسائل کا شکار آسٹریلوی ٹیم اپنے صف اول کے فاسٹ بولرز پیٹ کمنز اور جوش ہیزل ووڈ کے بغیر ٹی ٹوئنٹی ورلڈ کپ میں داخل ہو رہی ہے۔ پیٹ کمنز کمر کی تکلیف کے باعث دستبردار ہوئے جبکہ ہیزل ووڈ فٹنس ثابت کرنے میں ناکام رہے۔ مچل اسٹارک کی ریٹائرمنٹ کے بعد گزشتہ ایک دہائی میں یہ پہلا ورلڈ کپ ہوگا جب آسٹریلیا اپنے تینوں بڑے پیسرز کے بغیر میدان میں اترے گا۔

نیتھن ایلس جو اب زیویئر بارٹلیٹ اور بین ڈوارشوئس کے ہمراہ پیس اٹیک کی قیادت کریں گے نے کہا ہے کہ یہ نئی مثلث تجربہ کار ساتھیوں کی کمی پوری کرنے کی صلاحیت رکھتی ہے۔ ان کے بقول گزشتہ دو سالوں میں ہم نے ساتھ کرکٹ کھیلی ہے اور ہمارا تال میل بہت عمدہ ہے۔ ہیزل ووڈ اور کمنز کے بغیر بھی ہمارا اسکواڈ مضبوط ہے اور ہم ٹورنامنٹ میں بہت آگے جا سکتے ہیں۔

ایلس خود بھی ہیمسٹرنگ انجری کے باعث حالیہ میچ پریکٹس سے محروم رہے ہیں، جس کے دوران آسٹریلیا کو پاکستان کے خلاف وارم اپ سیریز میں وائٹ واش کا سامنا کرنا پڑا۔ انہوں نے تسلیم کیا کہ ہیزل ووڈ کی غیر موجودگی میں ان کا کردار تبدیل ہوگا اور وہ حالات کے مطابق خود کو ڈھالنے کی کوشش کریں گے۔