آئی سی سی پاکستان اور بھارت کے درمیان ٹی ٹوئنٹی ورلڈ کپ ٹاکرے کی بحالی کے لیے بات چیت میں مصروف

انٹرنیشنل کرکٹ کونسل (آئی سی سی) 15 فروری کو بھارت کے خلاف مجوزہ ٹی ٹوئنٹی ورلڈ کپ میچ کے ممکنہ بائیکاٹ کے معاملے کو حل کرنے کے لیے پاکستان کرکٹ بورڈ (پی سی بی) سے بات چیت کر رہی ہے۔ یہ بات اے ایف پی نے ہفتے کے روز ایک رپورٹ میں کہی ہے۔

روایتی حریف پاکستان اور بھارت کے درمیان کسی بھی فارمیٹ میں مقابلہ کرکٹ کے سب سے زیادہ منافع بخش میچوں میں شمار ہوتا ہے، جس کی مالیت نشریاتی حقوق، اسپانسرشپ اور اشتہاری آمدن کی مد میں کروڑوں ڈالر بنتی ہے۔

تاہم پاکستان کی حکومت کی جانب سے ٹیم کو کولمبو میں میچ نہ کھیلنے کی ہدایت کے بعد یہ مقابلہ شکوک و شبہات کا شکار ہو گیا ہے۔

پیش رفت سے آگاہ ذرائع نے اے ایف پی کو بتایا کہ پاکستان کرکٹ بورڈ نے کرکٹ کے عالمی ادارے سے باضابطہ رابطے کے بعد آئی سی سی سے بات چیت شروع کی ہے۔

ذرائع نے مزید بتایا کہ آئی سی سی تصادم کے بجائے مذاکرات کے ذریعے مسئلہ حل کرنے کی کوشش کر رہا ہے۔

20 ٹیموں پر مشتمل ٹورنامنٹ پر ایک سخت سیاسی دباؤ کا اثر پڑ گیا، جب بنگلہ دیش نے سیکورٹی خدشات کا حوالہ دیتے ہوئے بھارت میں کھیلنے سے انکار کر دیا اور اس کی جگہ اسکاٹ لینڈ نے لے لی۔

پاکستان نے اپنے گروپ اے کے میچ میں میزبان بھارت کے خلاف کھیلنے سے بطور احتجاج انکار کیا ہے۔

پاکستان، جس نے ہفتے کے روز ٹورنامنٹ کے افتتاحی میچ میں نیدرلینڈز کو شکست دی ہے، اگر یہ میچ ہار جاتا ہے تو اسے دو پوائنٹس کا نقصان ہوگا اور نیٹ رن ریٹ کو بھی بڑا دھچکا لگے گا۔

بھارتی کپتان سوریہ کمار یادو نے کہا ہے کہ ان کی ٹیم ٹاکرے کے لیے کولمبو جائے گی۔

پاکستان اور بھارت نے ایک دہائی سے زائد عرصے سے دو طرفہ کرکٹ نہیں کھیلی، اور صرف عالمی یا علاقائی ٹورنامنٹس میں ہی ایک دوسرے کا سامنا ہوتا ہے۔