تیسرے ٹی ٹوئنٹی میں پاکستان کا پہلے بیٹنگ کا فیصلہ، آسٹریلوی ٹیم میں چار تبدیلیاں

قذافی اسٹیڈیم میں اتوار کو کھیلے جانے والے تیسرے ٹی ٹوئنٹی انٹرنیشنل میں پاکستان نے ٹاس جیت کر آسٹریلیا کے خلاف پہلے بیٹنگ کرنے کا فیصلہ کیا ہے۔

میزبان ٹیم نے اپنی پلیئنگ الیون میں کوئی تبدیلی نہیں کی ہے اور فخر زمان، صائم ایوب اور بابر اعظم پر مشتمل ٹاپ آرڈر کو برقرار رکھا ہے، جبکہ سلمان علی آغا ٹیم کی قیادت کے فرائض انجام دے رہے ہیں۔ دوسری جانب آسٹریلیا نے اپنی ٹیم میں چار بڑی تبدیلیاں کی ہیں ٹریوس ہیڈ، زیویئر بارٹلیٹ، شان ایبٹ اور جوش انگلس کی جگہ بین ڈوارشوس، مارکس اسٹوئنس، جوش فلپ اور مچل اوون کو الیون کا حصہ بنایا گیا ہے۔

پاکستان کے اسکواڈ میں شاہین شاہ آفریدی، نسیم شاہ اور ابرار احمد پر مشتمل متوازن بولنگ اٹیک کے ساتھ ساتھ آل راؤنڈر شاداب خان اور محمد نواز بھی شامل ہیں۔ آسٹریلوی ٹیم کی قیادت مچل مارش کر رہے ہیں جبکہ ایڈم زمپا اسپن شعبے کی سربراہی کریں گے۔ یہ میچ تین میچوں پر مشتمل ٹی ٹوئنٹی سیریز کا آخری مقابلہ ہے۔

پاکستان کی ٹیم میں فخر زمان، صائم ایوب، بابر اعظم، سلمان علی آغا (کپتان)، خواجہ نافع، شاداب خان، محمد نواز، فہیم اشرف، شاہین آفریدی، نسیم شاہ اور ابرار احمد شامل ہیں۔

آسٹریلیا کی ٹیم میتھیو شارٹ، کیمرون گرین، میٹ رینشا، مچل مارش (کپتان)، مارکس اسٹوئنس، جوش فلپ، مچل اوون، کوپر کونیلی، بین ڈوارشوس، میتھیو کوہنیمین اور ایڈم زمپا پر مشتمل ہے۔