ٹی 20 ورلڈ کپ 2026 : تاریخیں، ماضی کے فاتحین اور انعامی رقم

ٹی 20 ورلڈ کپ 2026 کا میلہ 7 فروری سے بھارت اور سری لنکا میں سجنے جا رہا ہے، جہاں دفاعی چیمپئن بھارت اپنے ہوم گراؤنڈ پر ٹائٹل کا دفاع کرے گا۔ ٹورنامنٹ کا آغاز پاکستان اور نیدرلینڈز کے درمیان میچ سے ہوگا۔ 20 ٹیموں کو چار گروپس میں تقسیم کیا گیا ہے۔

گروپ اے میں پاکستان (کپتان سلمان علی آغا) اور بھارت (کپتان سوریا کمار یادو) کے ساتھ نیدرلینڈز اور نمیبیا شامل ہیں۔

گروپ بی میں آسٹریلیا اور سری لنکا، گروپ سی میں انگلینڈ اور ویسٹ انڈیز، جبکہ گروپ ڈی میں نیوزی لینڈ اور جنوبی افریقہ جیسی بڑی ٹیمیں مدمقابل ہوں گی۔ ہر گروپ سے دو ٹاپ ٹیمیں سپر 8 مرحلے میں پہنچیں گی۔

میچز بھارت کے 5 (احمد آباد، چنئی، دہلی، ممبئی، کولکتہ) اور سری لنکا کے 3 اسٹیڈیمز میں کھیلے جائیں گے۔ فائنل 8 مارچ کو احمد آباد یا کولمبو میں ہوگا۔

ماضی کے فاتحین: بھارت (2007، 2024)، پاکستان (2009)، انگلینڈ (2010، 2022)، ویسٹ انڈیز (2012، 2016)، سری لنکا (2014) اور آسٹریلیا (2021) عالمی چیمپئن بن چکے ہیں۔ روئٹرز کے مطابق یہ ایونٹ کرکٹ کی دنیا کا سب سے بڑا مقابلہ ثابت ہوگا۔

علاوہ ازیں آئی سی سی نے ٹی 20 ورلڈ کپ 2026 کے لیے انعامی رقم کے مجموعی پول میں گزشتہ ایڈیشن کے مقابلے میں تقریباً 20 فیصد اضافہ کیا ہے۔ اس سال مجموعی طور پر 13.5 ملین ڈالر (تقریباً 113 کروڑ بھارتی روپے یا 3.7 ارب پاکستانی روپے) تقسیم کیے جائیں گے۔

انعامی رقم کی تفصیل درج ذیل ہے:

فاتح ٹیم: 3 ملین ڈالر (تقریباً 25 کروڑ بھارتی روپے یا 83 کروڑ پاکستانی روپے)

رنر اپ (دوسرے نمبر پر آنے والی ٹیم): 1.6 ملین ڈالر

سیمی فائنل ہارنے والی ٹیمیں: 7 لاکھ 90 ہزار ڈالر (فی ٹیم)

سپر 8 مرحلے سے باہر ہونے والی ٹیمیں (نمبر 5 سے 12): 3 لاکھ 80 ہزار ڈالر (فی ٹیم)

گروپ مرحلے سے باہر ہونے والی ٹیمیں (نمبر 13 سے 20): 2 لاکھ 50 ہزار ڈالر (فی ٹیم)

اضافی بونس: گروپ مرحلے اور سپر 8 میں ہر میچ جیتنے پر ٹیم کو تقریباً 31,154 ڈالر الگ سے دیے جائیں گے۔