پنجاب نئے ڈیجیٹل دور میں داخل، وزیراعلیٰ کی زیر قیادت صوبائی وزراء کے لیے اے آئی تربیتی سیشن کا انعقاد

وزیراعلیٰ پنجاب مریم نواز شریف نے صوبائی وزراء کے لیے صوبے کے پہلے آرٹیفیشل انٹیلی جنس(اے آئی) تربیتی سیشن کی قیادت کی، جسے انہوں نے پنجاب میں ایک نئے ڈیجیٹل دور کا آغاز قرار دیا ہے۔

وزیراعلیٰ نے صوبائی کابینہ کے ارکان کے ہمراہ ایمپاورنگ پنجاب ود اے آئی کے عنوان سے منعقدہ ایک سرکاری ورکشاپ میں شرکت کی، جہاں گوگل فار ایجوکیشن کے ماہرین نے شرکاء کو گورننس اور پالیسی سازی میں اے آئی ٹولز کے عملی استعمال کے بارے میں بریفنگ دی۔

سیشن کے دوران وزیراعلیٰ نے پنجاب کے اسکولوں میں اے آئی کا استعمال لازمی قرار دے دیا اور صوبے میں گوگل ٹیک ویلی ڈیجیٹل ٹرانسفارمیشن ایڈوائزری بورڈ کے قیام کی منظوری دی۔

ورکشاپ سے خطاب کرتے ہوئے مریم نواز شریف نے کہا کہ ڈیجیٹل ٹیکنالوجی سوچنے اور کام کرنے کے طریقوں کو بدلنے کی صلاحیت رکھتی ہے۔

انہوں نے مزید کہا کہ اصلاحات اور مؤثر پالیسی سازی کے لیے اب اے آئی کا تعاون ناگزیر ہو چکا ہے۔ انہوں نے مثبت اور پائیدار تبدیلی لانے کے لیے اے آئی ٹولز کے ذمہ دارانہ استعمال پر بھی زور دیا۔

اس تربیت میں گورننس، پالیسی فریم ورک، آپریشنل پالیسی سازی، شعبہ جاتی اصلاحات اور پالیسی سمری کے تجزیے میں اے آئی کے استعمال پر بریفنگ دی گئی۔ کابینہ ارکان کو سرکاری امور کے لیے گوگل ٹولز بشمول جیمنائی کے مؤثر استعمال سے بھی متعارف کرایا گیا۔

اجلاس کو بتایا گیا کہ گوگل فار ایجوکیشن کے ٹیک ویلی اقدام کے تحت پنجاب میں 3,000 اساتذہ کے لیے ماسٹر ٹریننگ پروگرام شروع کیا جائے گا۔ مزید بتایا گیا کہ محکمہ سکول ایجوکیشن میں طلبہ کی 3 لاکھ سے زائد آئی ڈیز بنائی جائیں گی، جبکہ پنجاب ایجوکیشن فاؤنڈیشن سے منسلک 2 لاکھ طلبہ اور 2,000 اساتذہ بھی تربیت حاصل کریں گے۔ اس کے علاوہ صوبے میں ڈیجیٹل صحافت کے فروغ کے لیے 10 تنظیموں کو 1,000 اسکالرشپس بھی فراہم کی جائیں گی۔