کرانداز کے زیرِ اہتمام آف لائن پیمنٹس انوویشن چیلنج کا انعقاد

مالی شمولیت کو فروغ دینے کے لیے کرانداز پاکستان نے آف لائن پیمنٹس انوویشن چیلنج کے آخری مرحلے (پچ راؤنڈ) کا انعقاد کیا۔ یہ ایک جامع تشخیصی عمل تھا جس کا مقصد ’راست کے ذریعے ایسے محفوظ اور قابلِ توسیع ڈیجیٹل ادائیگیوں کے حل تلاش کرنا ہے جو انٹرنیٹ کی عدم موجودگی یا محدود دستیابی والے علاقوں میں کام کر سکیں۔

یہ اقدام مسائل کی نشاندہی سے آگے بڑھ کر عملی حل کی تیاری کی جانب ایک اہم قدم ہے، جس میں جدت پسندوں اور متعلقہ شعبوں کے ماہرین کو یکجا کیا گیا ہے ،تاکہ ایسی مقامی ٹیکنالوجیز تیار کی جائیں جو مستقل انٹرنیٹ کنکشن کی ضرورت کے بغیر کام کر سکیں۔

اس چیلنج کو مالیاتی شعبے کی جانب سے زبردست ردعمل ملا اور اسٹارٹ اپس، فن ٹیک اور ٹیکنالوجی کے ماہرین کی جانب سے متعدد معیاری تجاویز موصول ہوئیں، جن میں سے چند منتخب اداروں کو فائنل راؤنڈ کے لیے شارٹ لسٹ کیا گیا۔

شرکاء نے دو روز تک جاری رہنے والے سیشن میں اپنے حل چھ رکنی قومی و بین الاقوامی ججنگ پینل کے سامنے پیش کیے۔ اس پینل میں اردن سے لیانہ الوریکات، فارن کامن ویلتھ اینڈ ڈویلپمنٹ آفس سے صبیحہ احمد، ایشیائی ترقیاتی بینک سے شوزب علی، اسٹیٹ بینک آف پاکستان سے محمد عماد الدین، لمز یونیورسٹی سے ڈاکٹر زرتاش افضل ازمی اور کرانداز پاکستان کے چیف ڈیجیٹل آفیسر شرجیل مرتضیٰ شامل تھے۔

ان تجاویز کا جائزہ ٹیکنالوجی کی مضبوطی، سیکیورٹی، خطرات کے تدارک، ریگولیٹری قواعد سے ہم آہنگی، مارکیٹ میں اہمیت اور طویل مدتی پائیداری جیسے سخت معیارات کی بنیاد پر لیا گیا۔