میڈیسن کیز کو عبرتناک شکست : سبالینکا نے آسٹریلین اوپن فائنل کی ہار کا بدلہ لے لیا

دنیا کی نمبر ون ٹینس کھلاڑی ارینا سبالینکا نے جمعہ کو برسبین میں میڈیسن کیز کو شکست دے کر آسٹریلین اوپن کے لیے خطرے کی گھنٹی بجا دی۔ یہ مقابلہ گزشتہ سال کے میلبرن فائنل کا ری پلے تھا، جہاں کیز نے سبالینکا کو حیران کر دیا تھا لیکن اس بار بیلاروسی اسٹار نے امریکی حریف کو 3-6، 3-6 سے ہرا کر اپنا بدلہ لے لیا اور سیمی فائنل میں جگہ بنا لی۔

میڈیسن کیز روس کی ڈیانا شنائیڈر کے خلاف تین گھنٹے طویل تھکا دینے والے میچ کے 24 گھنٹے سے بھی کم وقت بعد میدان میں اتریں اور ان کی ران پر پٹی بندھی ہوئی تھی۔ وہ اپنی فطرت کے برعکس غلطیاں کرتی نظر آئیں اور اپنی سروس برقرار رکھنے میں انہیں مشکل پیش آئی، جبکہ سبالینکا نے بہترین ریٹرنز کے ذریعے میچ پر گرفت مضبوط رکھی۔

سبالینکا، جو 18 جنوری سے شروع ہونے والے آسٹریلین اوپن میں چار سالوں میں اپنا تیسرا ٹائٹل جیتنے کی کوشش کریں گی نے کہا کہ برسبین ٹورنامنٹ انہیں سال کے پہلے گرینڈ سلیم سے قبل فارم حاصل کرنے میں مدد دے رہا ہے۔ انہوں نے بتایا کہ وہ اپنی سروس اور نیٹ پر آکر کھیلنے جیسی مہارتوں پر کام کر رہی ہیں۔

سیمی فائنل میں سبالینکا کا مقابلہ چیک جمہوریہ کی کیرولینا موچووا سے ہوگا، جنہوں نے عالمی نمبر پانچ ایلینا ریباکینا کو ایک سخت مقابلے کے بعد 2-6، 6-2، 4-6 سے شکست دے کر سب کو حیران کر دیا۔ موچووا نے سبالینکا کے خلاف اپنے گزشتہ تینوں میچ جیتے ہیں، تاہم ان کا کہنا ہے کہ اب دونوں کھلاڑی پہلے سے مختلف اور بہتر ہو چکی ہیں اور آنے والا مقابلہ ایک اور بڑی جنگ ثابت ہو سکتا ہے۔