عالمی مارکیٹ میں سونا 4,500 ڈالر کی سطح سے تجاوز، چاندی اور پلاٹینم نے بھی ریکارڈ قائم کردیے

عالمی مارکیٹ میں سونے کی قیمت بدھ کو پہلی بار 4,500 ڈالر فی اونس کی حد عبور کرگئی جبکہ چاندی اور پلاٹینم نے بھی نئی ریکارڈ سطح کو چھو لیا۔ سرمایہ کاروں نے محفوظ سرمایہ کاری کی طلب اور توقعات کے پیش نظر قیمتی دھاتوں کا رخ کیا ہے جس کی بڑی وجہ یہ توقعات ہیں کہ امریکہ میں شرحِ سود آئندہ سال مزید کم ہوجائے گی۔

عالمی وقت کے مطابق صبح 03:59 بجے تک سونے کی قیمت 0.1 فیصد اضافے کے ساتھ 4,492.51 ڈالر فی اونس تک پہنچ گئی، جبکہ اسی سیشن کے اوائل میں قیمت 4,525.19 ڈالر کی بلند ترین تاریخی سطح کو چھو چکی تھی۔

فروری کی ترسیل کے لیے امریکی سونے کے مستقبل کے سودے 0.3 فیصد اضافے کے ساتھ 4,520.60 ڈالر کی ریکارڈ بلند ترین سطح پر پہنچ گئے۔

عالمی مارکیٹ میں سونے کے ساتھ ساتھ چاندی اور پلاٹینم کی قیمتوں میں بھی غیر معمولی اضافہ ہوا ہے۔ چاندی 1.2 فیصد اضافے کے ساتھ 72.27 ڈالر فی اونس پر پہنچ گئی جبکہ پلاٹینم میں 3.3 فیصد کا بڑا اچھال دیکھا گیا، جس سے اس کی قیمت 2,351.05 ڈالر ہوگئی۔

پیلاڈیم تقریباً 2 فیصد بڑھ کر 1,897.11 ڈالر پر پہنچ گیا، جو پچھلے تین سالوں کی بلند ترین سطح ہے۔

ٹیسٹی لائیو کے ہیڈ آف گلوبل میکرو، ایلیہ سپیوک نے قیمتی دھاتوں کی موجودہ لہر کا تجزیہ کرتے ہوئے کہا کہ قیمتی دھاتیں اب محض ایک تجارتی اثاثہ نہیں رہیں، بلکہ یہ اس تصور کے گرد ایک قیاس آرائی پر مبنی بیانیہ بن چکی ہیں کہ ڈی گلوبلائزیشن کے دور میں آپ کو ایک ایسے اثاثے کی ضرورت ہے جو غیر جانبدار ثالث کے طور پر کام کر سکے۔ ایک ایسا اثاثہ جو کسی ملکی یا ریاستی خطرے سے آزاد ہو، خاص طور پر جب امریکہ اور چین کے درمیان تناؤ برقرار ہے۔