حکومتِ سندھ کا تھر ڈیزرٹ ٹرین سفاری کا انعقاد

سیاحت کے فروغ کی کوششوں کے سلسلے میں محکمہ ثقافت و سیاحت، حکومتِ سندھ نے تھر ڈیزرٹ ٹرین سفاری کا اہتمام کیا جس کا آغاز کراچی کینٹ ریلوے اسٹیشن سے ہوا اور یہ کھوکھرا پار (ماروی ریلوے اسٹیشن – زیرو پوائنٹ) تک جائے گی۔

ٹرین کے حیدرآباد ریلوے اسٹیشن پہنچنے پر اسسٹنٹ کمشنر حیدرآباد سٹی سید نور حسین شاہ نے ٹرین سفاری کا استقبال کیا اور ریجنل ڈائریکٹر ٹورازم مخدوم گلزار کو گلدستہ پیش کیا۔ اس موقع پر اسسٹنٹ کمشنر نے کہا کہ یہ اقدام سندھ کی ثقافت اور سیاحت کے فروغ کی جانب ایک مثبت قدم ہے۔

میڈیا سے گفتگو کرتے ہوئے انہوں نے کہا کہ حکومتِ سندھ سیاحوں کو مزید سہولیات فراہم کرنے کے لیے اضافی اقدامات کر رہی ہے۔ ان کا کہنا تھا کہ سندھ ثقافتی ورثے اور سیاحتی مقامات سے مالا مال ہے۔ انہوں نے اس بات پر زور دیا کہ سیاحت کے فروغ کا مقصد سندھ کی ثقافت کو بین الاقوامی سیاحوں کے ساتھ ساتھ پاکستان کے عوام کے سامنے متعارف کرانا اور عوام کو تفریح کے بہتر مواقع فراہم کرنا ہے۔

اس موقع پر ریجنل ڈائریکٹر ٹورازم مخدوم گلزار نے سفاری ٹرین کے لیے حیدرآباد انتظامیہ، میڈیا اور عوام کی جانب سے کیے گئے پُرتپاک استقبال پر مسرت کا اظہار کیا۔

بعدازاں، ٹرین حیدرآباد ریلوے اسٹیشن سے کھوکھراپار زیرو پوائنٹ کے لیے روانہ ہوگئی۔