ریکوڈک: وزیرِاعظم کا شعبہ معدنیات میں آسٹریلوی دلچسپی کا خیرمقدم

وزیرِاعظم شہباز شریف نے آسٹریلیا کی پاکستان کے معدنیات کے شعبے میں بڑھتی ہوئی دلچسپی کا خیرمقدم کیا اور ریکوڈک منصوبے کو دونوں ممالک کے لیے مالی اور اسٹریٹجک فوائد حاصل کرنے کا اہم موقع قرار دیا۔

پاکستان میں آسٹریلیا کے نو تعینات شدہ ہائی کمشنر ٹم کین سے گفتگو کرتے ہوئے وزیراعظم شہباز شریف نے اقتصادی تعلقات کو مضبوط بنانے کے لیے کان کنی اور معدنیات کی صنعتوں کے ساتھ ساتھ دیگر شعبوں میں بڑھتے ہوئے امکانات سے فائدہ اٹھانے کے لیے اسلام آباد کی آمادگی پر زور دیا۔ وزیراعظم نے کہا کہ میں کان کنی اور معدنیات کے شعبے میں آسٹریلوی دلچسپی کا خیرمقدم کرتا ہوں، جس میں ریکوڈک اس شعبے میں پاکستان کی بے پناہ صلاحیتوں کی ایک روشن مثال کے طور پر موجود ہے۔

وزیرِاعظم نے پاکستان اور آسٹریلیا کے تعلقات کی مثبت سمت کو اجاگر کرتے ہوئے زراعت، لائیواسٹاک اور تجارت میں مواقع کی نشاندہی کی۔ انہوں نے کہا کہ پاکستان کاروبار کے لیے تیار ہے۔ انہوں نے ان شعبوں میں آسٹریلوی سرمایہ کاری کو راغب کرنے کی ملک کی خواہش پر زور دیا۔

وزیراعظم شہباز شریف نے 14 دسمبر 2025 کو سڈنی کے بونڈائی بیچ میں دہشت گردوں کی فائرنگ سے معصوم جانوں کے ضیاع پر گہرے رنج و غم کا اظہار کیا اور کہا کہ پاکستان دہشت گردی کی اس بزدلانہ کارروائی کی بلاامتیاز مذمت کرتا ہے۔

انہوں نے دکھ کی اس گھڑی میں آسٹریلیا کے ساتھ پاکستان کی یکجہتی کا اعادہ کرتے ہوئے کہا کہ دہشت گردی کا کوئی مذہب نہیں ہوتا اور اس کی ہر شکل اور صورت میں مذمت کی جانی چاہیے جبکہ اس لعنت کے خاتمے کے لیے اجتماعی کارروائی ناگزیر ہے۔

وزیراعظم نے کرکٹ کے لیے دونوں اقوام کے مشترکہ جذبے سمیت پاکستان اور آسٹریلیا کے درمیان مضبوط روابط اور ثقافتی رشتوں کی اہمیت پر بھی زور دیا۔ ملاقات کے دوران وزیراعظم نے آسٹریلوی قیادت کے لیے نیک خواہشات کا اظہار کیا اور کہا کہ وہ دونوں ممالک کے درمیان مضبوط تعلقات کے فروغ کے لیے باہمی تعاون کے منتظر ہیں۔

وزیراعظم نے ہائی کمشنر کو تقرری پر مبارکباد دیتے ہوئے اس اعتماد کا اظہار کیا کہ ان کی تعیناتی سے پاکستان اور آسٹریلیا کے درمیان دیرینہ اور دوستانہ تعلقات مزید مستحکم ہوں گے۔

انہوں نے آسٹریلیا میں مقیم پاکستانی تارکین وطن کے اہم کردار کو بھی اجاگر کیا اور انہیں دونوں ممالک کے درمیان پل قرار دیا۔