وارنر برادرز ڈسکوری بورڈ نے پیرا ماؤنٹ کی حریفانہ پیشکش مسترد کردی

وارنر برادرز ڈسکوری کے بورڈ آف ڈائریکٹرز نے بدھ کے روز پیرا ماؤنٹ اسکائی ڈانس کی جانب سے پیش کی گئی 108.4 ارب ڈالر کی حریفانہ ٹیک اوور پیشکش کو مسترد کر دیا، اور اسے “فرضی” قرار دیتے ہوئے الزام عائد کیا کہ اسٹوڈیو گروپ نے اپنی فنانسنگ کے حوالے سے شیئر ہولڈرز کو گمراہ کیا ہے۔

وارنر برادرز کے شیئر ہولڈرز کو لکھے گئے خط میں بورڈ نے کہا کہ پیرا ماؤنٹ مسلسل یہ دعویٰ کرتا رہا کہ اس کی 30 ڈالر فی شیئر نقد پیشکش مکمل طور پر ایلیسن خاندان کی جانب سے ضمانت شدہ ہے، حالانکہ حقیقت اس کے برعکس ہے۔ بورڈ کے مطابق یہ پیشکش متعدد سنگین خطرات کی حامل ہے اور کبھی بھی مکمل ضمانت کے ساتھ پیش نہیں کی گئی۔

بورڈ نے پیرا ماؤنٹ کی پیشکش کو نیٹ فلکس کے ساتھ طے پانے والے انضمام کے معاہدے سے کم تر قرار دیا۔ خط میں کہا گیا کہ نیٹ فلکس کی جانب سے 27.75 ڈالر فی شیئر کی پیشکش ایک پابند معاہدہ ہے، جس کے لیے ایکویٹی فنانسنگ درکار نہیں اور قرضوں کے حوالے سے مضبوط انتظامات موجود ہیں۔ اس کے برعکس پیرا ماؤنٹ کی پیشکش کسی بھی وقت معاہدے کی تکمیل سے قبل تبدیل یا ختم کی جا سکتی ہے۔

وارنر برادرز کے چیئرمین سیموئل دی پیازا کے مطابق شیئر ہولڈرز ووٹنگ کی تاریخ ابھی طے نہیں ہوئی، تاہم توقع ہے کہ یہ عمل بہار یا ابتدائی گرمیوں میں مکمل ہو جائے گا۔

نیٹ فلکس نے اس فیصلے کا خیرمقدم کرتے ہوئے کہا کہ وارنر برادرز بورڈ نے واضح کر دیا ہے کہ نیٹ فلکس کے ساتھ انضمام شیئر ہولڈرز کے بہترین مفاد میں ہے۔ نیٹ فلکس کے شریک چیف ایگزیکٹو کے مطابق کمپنی امریکی محکمہ انصاف اور یورپی کمیشن سے پہلے ہی رابطے میں ہے اور ریگولیٹری منظوری کے حوالے سے پُرامید ہے۔

وارنر برادرز کے بورڈ نے پیرا ماؤنٹ کی مالی حیثیت اور قرضوں کی سطح پر بھی سوالات اٹھائے، یہ کہتے ہوئے کہ مجوزہ انضمام کی صورت میں قرضوں کا بوجھ بہت زیادہ ہو جائے گا اور کمپنی کا مالی استحکام متاثر ہوگا۔ بورڈ کے مطابق پیرا ماؤنٹ کی جانب سے دونوں اسٹوڈیوز کے درمیان اربوں ڈالر کی ممکنہ بچت کا دعویٰ عملی طور پر نہایت مشکل ہے اور اس کے نتیجے میں ہالی وڈ میں مزید نوکریوں کے خاتمے کا خدشہ ہے۔

بورڈ نے آخر میں کہا کہ پیرا ماؤنٹ کو متعدد مواقع پر خامیوں سے آگاہ کیا گیا، مگر اس کے باوجود کوئی ایسی پیشکش سامنے نہیں آئی جو نیٹ فلکس کے معاہدے سے بہتر ہو۔