خواتین کا ٹرانس جینڈر کھلاڑیوں سے مقابلہ غیر منصفانہ ہے ، آریانا سبالینکا

بیلا روس کی نامور ٹینس اسٹار اور عالمی نمبر ون ٹینس کھلاڑی آریانہ سبالینکا نے خواتین کے کھیل میں ٹرانس جینڈر کھلاڑیوں کی شمولیت پر گفتگو کرتے ہوئے کہا کہ خواتین کا پیشہ ورانہ ٹینس میں ٹرانس جینڈر کھلاڑیوں سے مقابلہ کرانا غیر منصفانہ ہوگا۔

ڈبلیو ٹی اے ٹور کی جنس کے لحاظ سے شمولیت کی پالیسی کے مطابق ٹرانس جینڈر خواتین اس صورت میں حصہ لے سکتی ہیں اگر انہوں نے کم از کم چار سال کے لیے اپنی جنس خواتین کے طور پر ظاہر کی ہو، ٹیسٹوسٹیرون کی سطح کم کی ہو اور ٹیسٹنگ کے عمل سے متفق ہوں۔ یہ شرائط صورتِ حال کے لحاظ سے ڈبلیو ٹی اے میڈیکل مینیجر کی جانب سے بدلی جا سکتی ہیں۔

پائرس مورگن کے ساتھ ایک انٹرویو میں سابالینکا سے ٹرانس جینڈر کھلاڑیوں کے بارے میں سوال کیا گیا، جس میں انہوں نے کہا کہ یہ ایک مشکل سوال ہے۔ میرا ان کے ساتھ کوئی ذاتی مسئلہ نہیں ہے لیکن میں محسوس کرتی ہوں کہ انہیں خواتین پر بہت زیادہ فائدہ حاصل ہے اور میرے خیال میں خواتین کے لیے یہ منصفانہ نہیں کہ وہ بنیادی طور پر حیاتیاتی مردوں کا مقابلہ کریں۔

انہوں نے مزید کہا کہ یہ مقابلہ منصفانہ نہیں ہے۔ خواتین اپنی پوری زندگی محنت کرتی ہیں ، تاکہ اپنی حد تک پہنچ سکیں اور پھر انہیں ایسے شخص کا سامنا کرنا پڑتا ہے جو حیاتیاتی طور پر بہت زیادہ مضبوط ہے۔میرے لیے میں کھیل میں اس قسم کی چیزوں سے متفق نہیں ہوں۔