اولڈ از گولڈ : کوہلی اور روہت کی شاندار کارکردگی

عمر کے بڑھتے ہوئے سفر کے باوجود ویرات کوہلی اور روہت شرما ایک بار پھر ثابت کر رہے ہیں کہ وہ ون ڈے کرکٹ میں اب بھی بھارت ٹیم میں ریڑھ کی ہڈی کی حیثیت رکھتے ہیں۔ دونوں کے مستقبل کے حوالے سے چہ مگوئیاں جاری تھیں، لیکن ان کی حالیہ کارکردگی نے واضح کردیا ہے کہ وہ ابھی بھی اپنی بہترین فارم میں ہیں۔

ٹیسٹ اور ٹی ٹوئنٹی کی مصروفیات سے ہٹ کر انہوں نے اپنی توانائی ون ڈے فارمیٹ پر مرکوز کی ہے اور اس کے نتائج نمایاں طور پر سامنے آرہے ہیں۔

کوہلی کی مسلسل متاثر کن اننگز 74 ناٹ آؤٹ، 135، 102 اور 65 ناٹ آؤٹ ان کی مکمل واپسی کا واضح اعلان ہیں، جب کہ جنوبی افریقہ کے خلاف پلیئر آف دی سیریز ایوارڈ اس کا ثبوت ہے۔

دوسری جانب روہت شرما بھی ایک بار پھر فٹ اور منظم انداز میں کھیل رہے ہیں، پانچ اننگز میں چار نصف سنچریاں بنا کر انہوں نے اپنی اہمیت ثابت کردی۔

ان دونوں سینئر کھلاڑیوں کی موجودگی نے اسکواڈ میں شامل نوجوان بیٹرز، خصوصاً یشاسوی جیسوال کو سیکھنے اور بہتر کھیل پیش کرنے کا اعتماد دیا ہے۔

جنوبی افریقہ کے ہیڈ کوچ نے بھی اعتراف کیا کہ ویرات اور روہت کی بیٹنگ نوجوان کھلاڑیوں کے لیے مثالی نمونہ ہے۔ مستقبل کچھ بھی ہو، فی الحال یہ دونوں بھارت کے لیے قیمتی اثاثہ ہیں۔