کسٹمز انفورسمنٹ نے خیبر پختونخوا میں 74.4 ملین روپے کی اسمگلنگ کی کوششیں ناکام بنادی

خیبر پختونخوا میں کسٹمز انفورسمنٹ کلکٹریٹ پشاور نے ایک سلسلہ وار کارروائیوں میں تقریباً 74.4 ملین روپے مالیت کی اسمگل شدہ اشیا ضبط کر لی ہیں۔

ایف بی آر نے اتوار کو جاری بیان میں بتایا کہ سب سے بڑی کارروائی ڈیرہ اسماعیل خان میں ہوئی جہاں انفورسمنٹ ڈویژن نے تین ٹرکوں کو روکا جن میں 12,200 کلو گرام اسمگل شدہ سپاری، 4,021 سلیوز غیر ملکی سگریٹس اور 170 ٹائر لادے گئے تھے۔ ضبط شدہ سامان اور گاڑیوں کی مجموعی مالیت 54.5 ملین روپے بتائی گئی ہے۔

ڈی آئی خان ہی میں کسٹمز حکام نے مختلف مسافر گاڑیوں سے برآمد ہونے والی نان ڈیوٹی پیڈ کاسمیٹکس بھی قبضے میں لے لیں جن میں کریمیں، لوشنز، شیمپو اور پیٹرولیم جیلی شامل ہیں۔ ان اشیاء کی مالیت 2.4 ملین روپے ہے۔

پشاور ڈویژن نے دو نان ڈیوٹی پیڈ گاڑیاں، ٹویوٹا وٹز اور ٹویوٹا ایکوا، بھی تحویل میں لے لیں جن کی مالیت تقریباً 8 ملین روپے ہے۔

نوشہرہ میں اینٹی اسمگلنگ ڈائریکٹوریٹ نے ایک جیک پک اپ پکڑی جس میں 2,000 سلیوز اسمگل شدہ سگریٹس بھری تھیں۔ گاڑی اور سامان کی مجموعی قیمت 9.5 ملین روپے لگائی گئی ہے۔

ایف بی آر کے مطابق یہ کارروائیاں پاکستان کسٹمز کی اسمگلنگ کے خلاف جاری کوششوں اور قومی معیشت کے تحفظ کے عزم کی عکاس ہیں۔