عمران خان ’ٹھیک ہیں لیکن ذہنی اذیت میں ہیں، عظمیٰ خان
- سابق وزیر اعظم کو قید تنہائی میں رکھنے کی وجہ سے "ذہنی اذیت" کا نشانہ بنایا جا رہا ہے، اڈیالہ جیل میں قید بھائی سے ملاقات کے بعد بہن کی میڈیا سے گفتگو
پاکستان تحریکِ انصاف (پی ٹی آئی) کے بانی عمران خان کی بہن عظمیٰ خان نے منگل کو اڈیالہ جیل کا دورہ کرنے کے بعد اپنے بھائی کی صحت کی تصدیق کرتے ہوئے کہا کہ عمران خان کی صحت بالکل ٹھیک ہے اور وہ مکمل طور پر صحتمند ہیں۔
آج نیوز کی رپورٹ کے مطابق یہ دورہ وکلاء اور خاندان کے افراد کے لیے مختص دن پر ہوا۔ جیل میں اپنے قید بھائی سے ملاقات کے بعد عظمیٰ خان نے میڈیا سے بات کرتے ہوئے بتایا کہ ان کی جسمانی صحت تو اچھی ہے، لیکن پی ٹی آئی کے بانی کو “تنہائی کی کوٹھری میں رکھنے کی وجہ سے مسلسل ذہنی اذیت” کا سامنا ہے۔
ادھر مرکزی جیل (اڈیالہ) راولپنڈی کے باہر پارٹی کارکنوں کے احتجاج کے باعث پولیس کی بھاری نفری تعینات کی گئی ہے کیونکہ سابق وزیرِ اعظم تک خاندان کی رسائی ابھی بھی تنازع کا موضوع بنی ہوئی ہے۔
بانی پی ٹی آئی عمران خان کی ایک اور بہن علیمہ خان کے مطابق جیل حکام نے ان کی بہن نورین خان کو 4 نومبر کو عمران خان سے ملاقات کی اجازت دی تھی لیکن “اس کے بعد کسی اور کو ان سے ملاقات کی اجازت نہیں دی گئی۔”
علیمہ خان کے مطابق عمران خان اور ان کی بہن کے درمیان ملاقات اس وقت ممکن ہوئی جب علیمہ نے اڈیالہ جیل کے سپرنٹنڈنٹ اور تین دیگر سرکاری اہلکاروں کے خلاف اسلام آباد ہائی کورٹ (آئی ایچ سی) میں توہین عدالت کی درخواست دائر کی تھی کیونکہ انہیں جیل میں عمران خان سے ملاقات کی اجازت نہیں دی گئی تھی۔
درخواست میں الزام لگایا گیا تھا کہ حکام عدالت کے اس حکم پر عمل کرنے میں ناکام رہے جس کے تحت علیمہ خان کو اپنے بھائی سے ملاقات کی اجازت دی جانی تھی۔
یہ پیش رفت اس اقدام کے ایک روز بعد سامنے آئی جب پی ٹی آئی نے اپنے بانی چیئرمین کی خیریت کے حوالے سے گردش کرنے والی بدنیتی پر مبنی مذموم افواہوں پر تشویش کا اظہار کیا اور حکومت سے فوری وضاحت جاری کرنے پر زور دیا ہے۔
Comments
Comments are closed.