گردشی قرض منصوبہ: او جی ڈی سی ایل کو سود کی پانچویں قسط کے طور پر 7.73 ارب موصول

آئل اینڈ گیس ڈیولپمنٹ کمپنی لمیٹڈ (او جی ڈی سی ایل) نے کہا ہے کہ اسے حکومت کے سرکلر ڈیٹ سیٹلمنٹ پلان کے تحت پاور ہولڈنگ (پرائیویٹ) لمیٹڈ (پی ایچ ایل) سے 7.725 ارب روپے کی پانچویں قسط موصول ہوگئی ہے۔

پاکستان کی سب سے بڑی ایکسپلوریشن اینڈ پروڈکشن کمپنی نے یہ پیش رفت منگل کو پاکستان اسٹاک ایکسچینج (پی ایس ایکس) کو بھیجے گئے ایک نوٹس میں بتائی۔

نوٹس میں کہا گیا کہ 92 ارب روپے کے مجموعی سود کی رقم بارہ مساوی ماہانہ اقساط میں ادا کی جانی ہے، جس کا آغاز جولائی 2025 سے ہوگا۔

او جی ڈی سی ایل کے مطابق اس قسط کی وصولی جو بارہ ماہانہ اقساط میں سے ایک ہے توانائی شعبے میں گردشی قرضے کے مسئلے کے حل کے لیے حکومت کی جانب سے جاری کوششوں میں مستقل پیشرفت کی غمازی کرتی ہے۔

گزشتہ سال جون میں حکومت نے گردشی قرضے کے تصفیہ منصوبے کے تحت او جی ڈی سی ایل کو 82 ارب روپے کی ادائیگی کی منظوری دی تھی۔ یہ رقم پی ایچ ایل کی جانب سے جاری کردہ پرائیویٹلی پلیسڈ ٹرم فنانس سرٹیفکیٹس (پی پی ٹی ایف سی) میں کمپنی کی سرمایہ کاری سے متعلق تھی۔

حکومت نے مجموعی سود کی رقم 92 ارب روپےکی ادائیگی کی بھی منظوری دی تھی جس کی ادائیگی جولائی 2025 سے شروع ہو کر بارہ مساوی اقساط میں مکمل ہوگی۔

او جی ڈی سی ایل 23 اکتوبر 1997 کو کمپنیز آرڈیننس 1984 (جو اب کمپنیز ایکٹ 2017 ہے) کے تحت وجود میں آئی۔ کمپنی تیل و گیس کے ذخائر کی تلاش، ترقی، پیداوار اور فروخت سمیت وہ تمام سرگرمیاں انجام دیتی ہے جو اس سے قبل 1961 میں قائم ہونے والی آئل اینڈ گیس ڈیولپمنٹ کارپوریشن کے ذریعے کی جاتی تھیں۔