صنعتی صارفین پر بجلی بوجھ کے اثرات ، کاٹی کا تقابلی ڈیٹا فراہم کرنے کا مطالبہ

کورنگی ایسوسی ایشن آف ٹریڈ اینڈ انڈسٹری (کاٹی) نے صنعتی صارفین پر پڑنے والے مجموعی مالی اثرات کا جائزہ لینے کے لیے فیول چارجز ایڈجسٹمنٹ (ایف سی اے)، کیپیسٹی چارجز اور نیٹ میٹرنگ سے متعلق تقابلی ڈیٹا فراہم کرنے کی درخواست کی ہے۔ یہ مطالبہ رجسٹرار وسیم بھنڈر کو لکھے گئے ایک خط میں آئندہ اکتوبر 2025 کی ایف سی اے سماعت جو 27 نومبر 2025 کو ہوگی سے قبل کیا گیا ہے۔

کاٹی نے کہا کہ 7 نومبر 2025 کے فیصلے میں نیپرا نے واضح طور پر سی پی پی اے، جی کو ہدایت دی تھی کہ وہ اپنا تفصیلی جواب اور متعلقہ معلومات تمام آئندہ ایف سی اے سماعتوں میں جمع کرائے، لیکن گزشتہ دو سماعتوں میں مطلوبہ معلومات فراہم نہیں کی گئیں۔

ایسوسی ایشن کے مطابق یہ صورتحال ریگولیٹری شفافیت کو متاثر کرتی ہے اور صنعتی صارفین کے لیے یکساں ایف سی اے کے اصل مالی اثرات کو سمجھنا مشکل بنا دیتی ہے۔

خط میں زور دیا گیا کہ یکساں اور غیر یکساں ایف سی اے کے مابین حقیقی فرق، کے الیکٹرک صارفین پر ممکنہ اور لاگو شدہ ایف سی اے کا موازنہ اور وفاقی حکومت و کراچی صارفین پر پڑنے والے مالی بوجھ کو ریکارڈ پر لایا جائے۔

کاٹی نے یہ بھی نشاندہی کی کہ کے الیکٹرک کو فراہم کی گئی 2050 میگاواٹ اضافی بجلی کے بعد کیپیسٹی ادائیگیوں میں ہونے والی تبدیلیوں، آئڈل کیپیسٹی میں کمی اور اس سے پیدا ہونے والی ممکنہ بچت کی وضاحت بھی ضروری ہے، تاکہ معلوم ہو سکے کہ آیا یہ فوائد صارفین تک منتقل ہوئے ہیں یا نہیں۔