صنعتوں اور گھریلو صارفین کو گیس بحران نے جکڑ لیا ، حیدرآباد چیمبر

حیدرآباد چیمبر آف اسمال ٹریڈرز اینڈ اسمال انڈسٹری کے صدر محمد سلیم میمن نے صنعتوں اور گھریلو صارفین کو درپیش شدید گیس بحران پر گہری تشویش کا اظہار کیا ہے۔

انہوں نے کہا کہ سردیوں کے آغاز کے ساتھ ہی گیس کے دباؤ اور فراہمی میں کمی سے صنعتی پیداوار بری طرح متاثر ہو رہی ہے، جبکہ گھریلو صارفین بھی شدید مشکلات کا سامنا کر رہے ہیں۔

انہوں نے مزید کہاکہ 40 فیصد چھوٹی صنعتیں متاثر جب کہ برآمدی شعبہ دباؤ میں ہے۔سلیم میمن کے مطابق اوگرا کی جانب سے گیس نرخوں میں مسلسل اضافے اور سپلائی میں کمی نے صورتحال کو مزید خراب کر دیا ہے۔

ان کا کہنا تھا کہ ملک بھر کی 40 فیصد چھوٹی صنعتیں کم پریشر اور غیر یقینی فراہمی سے متاثر ہیں جبکہ سندھ میں سیکڑوں صنعتی یونٹ جزوی طور پر بند ہو چکے ہیں۔ اس سے برآمدات متاثر اور ہزاروں روزگار خطرے میں ہیں۔

انہوں نے کہا کہ حکومت کو بار بار نرخ بڑھانے کے بجائے گیس چوری اور لائن لاسز پر قابو پانے کے لیے اقدامات کرنے چاہئیں۔ دنیا بھر میں ایل پی جی ، بایو گیس، شمسی اور ہوا سے توانائی کے منصوبے کامیابی سے چل رہے ہیں، پاکستان کو بھی ان پر ہنگامی بنیادوں پر عمل کرنا چاہیے۔

سلیم میمن نے ایف پی سی سی آئی کے صدر سے اپیل کی کہ وہ تمام چیمبرز اور صنعتی نمائندوں کو شامل کرتے ہوئے ایک قومی توانائی کانفرنس بلائیں ، تاکہ مشترکہ پالیسی تشکیل دی جا سکے۔