اسٹار لنک انٹرنیٹ سروس بھارت میں شروع کرنے کی تیاری

بھارتی ریاست مہاراشٹر جہاں مالیاتی مرکز ممبئی ہے، دنیا کے سب سے زیادہ آبادی والے ملک بھارت میں ایلون مسک کی کمپنی اسٹار لنک کی انٹرنیٹ سروس متعارف کرانے والی پہلی ریاست بننے جا رہی ہے۔ وزیر اعلیٰ دیویندر فڈنویس نے بدھ کی رات ایکس (سابقہ ٹوئٹر) پر اس پیش رفت کا اعلان کیا۔

اسٹار لنک، جو نچلے مدار کے سیٹلائٹس کے ذریعے دور دراز علاقوں میں تیز رفتار انٹرنیٹ فراہم کرتی ہے، بھارت میں کئی تنازعات کا باعث بنی ہے جن میں مسابقتی قیمتوں اور اسپیکٹرم الاٹمنٹ کے مسائل شامل ہیں۔

بھارت، جہاں رواں سال کے اختتام تک انٹرنیٹ صارفین کی تعداد 90 کروڑ سے تجاوز کرنے کا امکان ہے، نے جون میں اسٹار لنک کو لائسنس جاری کیا تھا۔دیویندر فڈنویس نے کہا کہ مہاراشٹر باضابطہ طور پر اسٹار لنک کے ساتھ اشتراک کرنے والی پہلی بھارتی ریاست بننے جا رہی ہے۔ ان کے مطابق یہ شراکت ریاست کو سیٹلائٹ سے چلنے والے ڈیجیٹل انفراسٹرکچر میں ملک کی قیادت کرنے کے قابل بنائے گی۔

مارچ میں بھارت کی دو بڑی ٹیلی کام کمپنیوں، جیو پلیٹ فارمز اور بھارتی ایئرٹیل، نے اسپیس ایکس کے ساتھ معاہدے کیے تھے تاکہ اپنے صارفین کو اسٹار لنک انٹرنیٹ فراہم کیا جا سکے۔

اسٹار لنک کی نائب صدر برائے کاروباری امور، لارن ڈریئر، نے کہا کہ وہ بھارت کے ڈیجیٹل وژن کو آگے بڑھانے پر پُرجوش ہیں۔ ان کے مطابق ہم اسکولوں، طبی مراکز اور ان دور دراز علاقوں کو جوڑنے کے منتظر ہیں جہاں انٹرنیٹ کی رسائی اب تک ممکن نہیں ہو سکی، جیسے ہی اسٹار لنک کو حتمی منظوری ملے گی۔

امریکا کی کئی بڑی ٹیکنالوجی کمپنیاں اس سال بھارت میں اپنے اثر و رسوخ کو بڑھانے کے منصوبوں کا اعلان کر چکی ہیں۔ اکتوبر میں گوگل نے بھارت میں 15 ارب ڈالر کی سرمایہ کاری کا اعلان کیا تاکہ وہاں ایک بڑا ڈیٹا سینٹر اور مصنوعی ذہانت (اے آئی) کا مرکز قائم کیا جا سکے جو امریکا کے بعد اس کا سب سے بڑا اے آئی منصوبہ ہوگا۔

امریکی کمپنیاں انتھروپک اور اوپن اے آئی بھی بھارت میں دفاتر قائم کرنے کا ارادہ رکھتی ہیں، جبکہ پرپلکسیٹی نے جولائی میں بھارتی ٹیلی کام کمپنی ایئرٹیل کے ساتھ اہم شراکت داری کا اعلان کیا تھا۔