بی جے پی غریب ترین ریاست بہار میں اہم انتخاب کیلئے تیار

بھارت کی غریب ترین ریاست بہار میں جمعرات کو انتخابات ہونے جا رہے ہیں، جہاں 13 کروڑ آبادی کے لیے سب سے بڑا مسئلہ روزگار اور معیشت ہے۔ وزیر اعظم نریندر مودی کی جماعت بھارتیہ جنتا پارٹی (بی جے پی) عوام کو مالی ترغیبات دے کر ووٹ حاصل کرنے کی کوشش کر رہی ہے تاکہ ریاست پر مکمل کنٹرول حاصل کیا جا سکے۔

سیاسی مبصرین کے مطابق بہار میں کامیابی بی جے پی کو اگلے سال کے عام انتخابات سے قبل دیگر اہم ریاستوں میں اپنی پوزیشن مضبوط کرنے میں مدد دے سکتی ہے۔ ہندو اکثریتی ریاست بہار، جو آبادی کے لحاظ سے میکسیکو کے برابر ہے، شمالی بھارت میں واحد ایسی ریاست ہے جہاں بی جے پی نے کبھی تنہا حکومت نہیں بنائی۔

ریاست کے بیشتر مکینوں کی طرح مظفرپور کی رہائشی راجکماری دیوی بھی غربت اور بے روزگاری سے پریشان ہیں۔ ان کے شوہر مزدوری کر کے روزانہ 400 سے 500 روپے کماتے ہیں، مگر اکثر کئی دن تک کام نہیں ملتا۔ بہار غربت کے اشاریوں میں پورے بھارت میں سب سے نیچے ہے، جہاں فی کس آمدن محض 52 ہزار 379 روپے سالانہ ہے۔

تاہم گزشتہ دہائی میں کچھ بہتری آئی ہے۔ 2016 میں 50 فیصد سے زائد آبادی کثیر الجہتی غربت کا شکار تھی، جو 2021 تک کم ہو کر تقریباً ایک تہائی رہ گئی۔

مودی نے ستمبر میں آٹھ ارب ڈالر کے ترقیاتی منصوبوں کا اعلان کیا جن میں سڑکوں، ریل اور ہوائی اڈے کی توسیع، زرعی اسکیمیں اور خواتین کے لیے 10 ہزار روپے فی کس کی مالی امداد شامل ہے۔

بی جے پی کو ریاستی وزیراعلیٰ نتیش کمار کی جماعت جنتا دل (یونائیٹڈ) کی حمایت حاصل ہے، مگر اپوزیشن اتحادراشٹریہ جنتا دل (آر جے ڈی) اور کانگریس سے سخت مقابلے کا سامنا ہے۔

انتخابات دو مراحل میں 6 اور 11 نومبر کو ہوں گے جبکہ نتائج 14 نومبر کو آئیں گے۔ تجزیہ کاروں کے مطابق نتیجہ اس بات کا فیصلہ کرے گا کہ عوام اپنے بہتر مستقبل کے لیے کس جماعت پر اعتماد کرتے ہیں۔