ورلڈ بینک نے 5 کروڑ 10 لاکھ ڈالر مالیت کے مہاجرین سے متعلق منصوبے کی پیش رفت کو تسلی بخش قرار دیدیا

ورلڈ بینک نے تقریبا 5 کروڑ 10 لاکھ ڈالر مالیت کے منصوبے ”دی اسٹرینتھننگ انسٹی ٹیوشنز فار ریفیوجی ایڈمنسٹریشن پراجیکٹ“ کی عمل درآمدی پیش رفت کو معتدل حد تک تسلی بخش قرار دیا ہے۔

سرکاری دستاویزات کے مطابق جولائی سے ستمبر کے دوران منصوبے میں کچھ پیش رفت ریکارڈ کی گئی ہے۔ منصوبے کے تحت کئی نتائج حاصل کیے گئے ہیں جن کی تصدیق آڈیٹر جنرل کا دفتر کرے گا جو اکتوبر میں تیسرے فریق کے طور پر ویری فیکیشن ایجنٹ (ٹی پی وی اے) کے طور پر اپنی رپورٹ پیش کرے گا۔ یہ رپورٹ اکتوبر کے آخر تک متوقع ہے۔

منصوبے کے تحت کئی اہم سرگرمیاں مکمل کی گئی ہیں جن میں ریفیوجی لرننگ پروگرام کی فراہمی، ادارہ جاتی و تنظیمی جائزے کی پیشکش، انٹرمینسٹریل اسٹیئرنگ کمیٹی کے لیے پیشہ ور عملے کا خاکہ تیار کرنا، اور صنفی بنیاد پر تشدد، ہراسانی اور بدسلوکی کی روک تھام و تدارک سے متعلق تربیت کی تکمیل شامل ہے۔

تاہم رپورٹ میں اس بات پر زور دیا گیا ہے کہ منصوبے کی مقررہ مدت ختم ہونے سے قبل تمام اہداف کے حصول کے لیے خریداری سے متعلق سرگرمیوں کے آخری مراحل پر بھرپور توجہ دینا ضروری ہوگا۔

کاپی رائٹ بزنس ریکارڈر، 2025