نیو یارک میں موسلا دھار بارشیں، دو افراد ہلاک، پروازیں متاثر

نیو یارک شہر میں جمعرات کے روز موسلا دھار بارشوں نے تباہی مچائی، جس کے نتیجے میں دو افراد ہلاک ہوگئے، شدید طوفانی بارشوں کے باعث پروازیں متاثر ہوئیں اور محکمہ موسمیات نے بعض علاقوں میں سیلاب کے خدشات کی وارننگ جاری کی۔

میڈیا رپورٹس کے مطابق شہر میں مختلف مقامات پر پانی جمع ہوگیا اور املاک کو نقصان پہنچا۔ شہر کے جی ایف کے، لاگارڈیا اور نیوآرک ایئرپورٹس کے حکام نے بتایا کہ طوفان کے باعث پروازوں کے شیڈول متاثر ہوئے۔

شہر کے میئر ایرک ایڈمز نے بتایا کہ یہ طوفان 30 اکتوبر کے لیے بارش کے ریکارڈ توڑ گیا، اور زیادہ تر بارش جو چند گھنٹوں میں ہونے کی توقع تھی، سہ پہر کے صرف 10 منٹ میں ہو گئی۔

محکمہ موسمیات نے سینٹرل پارک میں 1.85 انچ (4.7 سینٹی میٹر) بارش ریکارڈ کی جبکہ لاگارڈیا ایئرپورٹ پر 2.09 انچ (5.31 سینٹی میٹر) اور نیوآرک لبرٹی انٹرنیشنل ایئرپورٹ پر 1.99 انچ (5.05 سینٹی میٹر) بارش ریکارڈ کی گئی۔

نیشنل ویدر سروس نے برونکس، بروکلن اور کوئینز کے ساحلی علاقوں میں سیلاب کی وارننگ بھی جاری کی۔ شہریوں کو ہدایت دی گئی کہ وہ غیر ضروری سفر سے گریز کریں اور محفوظ مقامات پر رہیں۔

موسلا دھار بارشوں نے شہر کی ٹریفک اور روزمرہ زندگی پر بھی اثر ڈالا، جبکہ امدادی ادارے متاثرہ علاقوں میں فوری کارروائی کر رہے ہیں تاکہ ممکنہ نقصانات کو کم سے کم کیا جا سکے۔