ٹرمپ کی تنبیہ نظرانداز، روس نے چند دنوں میں دوسرے ایٹمی ہتھیار کا تجربہ کرلیا

روس نے ایک جدید ایٹمی صلاحیت رکھنے والے اور ایٹمی توانائی سے چلنے والے زیرِ آب ڈرون کا کامیاب تجربہ کیا ہے، جس کا اعلان صدر ولادیمیر پیوٹن نے بدھ کے روز کیا۔ یہ اعلان ایسے وقت میں سامنے آیا جب امریکی صدر ڈونلڈ ٹرمپ نے ماسکو کو حالیہ ایٹمی تجربات پر خبردار کیا تھا۔ چند دنوں کے اندر روس کی جانب سے یہ دوسرا نیا ایٹمی ہتھیاروں کا تجربہ ہے۔

پیوٹن نے بتایا کہ گزشتہ روز ایک اور جدید نظام کا تجربہ کیا گیا، بغیر عملے کے زیرِ آب آلہ پوسائیڈن، جو ایٹمی توانائی کے یونٹ سے لیس ہے۔ انہوں نے کہا کہ اس ڈرون ٹارپیڈو کو روکا نہیں جا سکتا اور یہ روایتی آبدوزوں کے مقابلے میں زیادہ تیز رفتار ہے، جو دنیا کے کسی بھی براعظم تک پہنچ سکتا ہے۔

روسی صدر کے مطابق پوسائیڈن کی رفتار اور گہرائی تک غوطہ لگانے کی صلاحیت کسی بھی ملک کے پاس موجود ٹیکنالوجی سے کہیں زیادہ ہے۔ انہوں نے کہا کہ مستقبل قریب میں ایسا کوئی نظام سامنے آنا ممکن نہیں۔

روسی خبر رساں ادارے تاس نے دفاعی صنعت کے ذرائع کے حوالے سے بتایا کہ یہ ڈرون ایک کلومیٹر سے زائد گہرائی میں 70 ناٹس کی رفتار سے بغیر پکڑے گئے حرکت کر سکتا ہے اور دو میگا ٹن تک کا ایٹمی وارہیڈ لے جانے کی صلاحیت رکھتا ہے۔

یہ نظام پہلی بار 2018 میں آزمایا گیا تھا۔ دوسری جانب، اتوار کو روس نے بورے ویستنک نامی لامحدود رینج رکھنے والے ایٹمی کروز میزائل کا تجربہ کیا، جس پر ٹرمپ نے تنقید کرتے ہوئے کہا کہ پیوٹن کو ہتھیاروں کے بجائے یوکرین میں جنگ ختم کرنے پر توجہ دینی چاہیے، جو اب اپنے چوتھے سال میں داخل ہو چکی ہے۔