اسٹیٹ بینک کی پالیسی ریٹ برقرار رکھنے کے فیصلے پر 100 انڈیکس 1100 سے زائد پوائنٹس گر گیا

پاکستان اسٹاک ایکسچینج (پی ایس ایکس) میں پیر کے روز مندی کا رجحان رہا کیونکہ سرمایہ کار مانیٹری پالیسی کمیٹی (ایم پی سی) کے فیصلے سے متعلق محتاط دکھائی دیے۔ بینچ مارک کے ایس ای 100 انڈیکس 1100 سے زائد پوائنٹس کی کمی کے ساتھ بند ہوا۔

کاروباری دن کے دوران توانائی اور مینوفیکچرنگ سمیت اہم شعبوں میں منافع کے حصول کے رجحان نے مارکیٹ پر دباؤ ڈالا، جس کے نتیجے میں کے ایس ای 100 انٹرا ڈے کی کم ترین سطح 161,766.61 پوائنٹس تک گر گیا۔

کاروبار کے اختتام پر بینچ مارک کے ایس ای 100 انڈیکس 1,140.32 پوائنٹس (0.7 فیصد) کمی کے ساتھ 162,163.81 پوائنٹس پر بند ہوا۔

انڈیکس میں گراوٹ کے بڑے محرکات میں پی ایس او، لکی سیمنٹ، یو بی ایل، ایم اے آر آئی اور پی پی ایل شامل تھے، جنہوں نے مجموعی طور پر انڈیکس کو 505 پوائنٹس تک نیچے کھینچا۔

اسٹیٹ بینک آف پاکستان (ایس بی پی) کی مانیٹری پالیسی کمیٹی نے مارکیٹ کی توقعات کے مطابق پالیسی ریٹ کو پیر کے روز 11 فیصد پر برقرار رکھنے کا فیصلہ کیا۔

گزشتہ ہفتے بھی پی ایس ایکس میں ملا جلا رجحان رہا کیونکہ جغرافیائی سیاسی کشیدگی میں کمی پر ابتدائی مثبت تاثر منافع کے حصول، بینکنگ سیکٹر کے کمزور سہ ماہی نتائج اور فیوچرز رول اوور ہفتے سے قبل سرمایہ کاروں کی محتاط پالیسی کے باعث دب گیا۔

کے ایس ای 100 انڈیکس نے گزشتہ ہفتے کے دوران 0.3 فیصد کمی کے ساتھ 163,304 پوائنٹس پر اختتام کیا تھا۔

عالمی سطح پر پیر کو ایشیائی اسٹاکس میں نمایاں اضافہ دیکھا گیا جبکہ ڈالر نسبتاً مستحکم رہا کیونکہ چین اور امریکہ کے درمیان تجارتی کشیدگی میں کمی کی علامات نے سرمایہ کاروں کے اعتماد اور خطرہ مول لینے کی خواہش کو تقویت دی۔ یہ ہفتہ ایک مضبوط آغاز کے ساتھ شروع ہوا، جس میں مرکزی بینکوں کے اجلاس اور بڑی کمپنیوں کے مالیاتی نتائج مرکزی توجہ کا مرکز ہوں گے۔

امریکی اور چینی اعلیٰ اقتصادی حکام نے اتوار کو ایک تجارتی معاہدے کے فریم ورک پر تفصیلی بات چیت کی تاکہ امریکی صدر ڈونلڈ ٹرمپ اور ان کے چینی ہم منصب شی جن پنگ اس ہفتے کے آخر میں جنوبی کوریا میں ہونے والی اپنی بے حد متوقع ملاقات میں اس پر فیصلہ کر سکیں۔

تجارتی معاہدہ امریکہ کی جانب سے سخت ٹیرف عائد کرنے اور چین کی جانب سے نایاب معدنیات کی برآمدات پر کنٹرول کو مؤخر کر دے گا جس سے دنیا کی دو سب سے بڑی معیشتوں کے درمیان بڑھتی ہوئی تجارتی کشیدگی کے باعث پیدا ہونے والی سرمایہ کاروں کی بے چینی کم کرنے میں مدد ملے گی۔

اس پیشرفت کے نتیجے میں اسٹاک مارکیٹس میں نمایاں تیزی دیکھی گئی, جنوبی کوریا کا کوپسی اور جاپان کا مکئی انڈیکس دونوں 2 فیصد سے زیادہ بڑھ گئے اور نئی بلند ترین سطحوں کو عبور کیا۔ جاپان کے علاوہ ایشیا پیسیفک حصص کا ایم ایس سی آئی کا وسیع ترین انڈیکس 1.3 فیصد بڑھ گیا۔

دوسری جانب انٹر بینک مارکیٹ میں پیر کے روز امریکی ڈالر کے مقابلے میں پاکستانی روپے نے معمولی بہتری حاصل کی۔ اسٹیٹ بینک آف پاکستان (ایس بی پی) کے مطابق کاروبار کے اختتام پر ڈالر کے مقابلے میں مقامی کرنسی ایک پیسے اضافے کے ساتھ 281.01 روپے پر بند ہوئی۔

آل شیئر انڈیکس پر کاروباری حجم گزشتہ سیشن کے 1.041 ارب سے گھٹ کر 1.006 ارب شیئرز رہا، جب کہ حصص کی مالیت 35.02 ارب روپے سے کم ہو کر 34.82 ارب روپے رہ گئی۔

ورلڈ کال ٹیلی کام 164.29 ملین شیئرز کے ساتھ کاروباری حجم میں سرِفہرست رہی، جس کے بعد کے الیکٹرک لمیٹڈ کے 123.43 ملین اور بینک آف پنجاب کے 61.77 ملین شیئرز کا لین دین ہوا۔

پیر کے روز مجموعی طور پر 479 کمپنیوں کے شیئرز کا کاروبار ہوا، جن میں سے 157 کے حصص کی قیمت میں اضافہ، 277 میں کمی جبکہ 45 کے نرخ مستحکم رہے۔