ٹریٹ کارپوریشن پرسنل کیئر سیکٹر میں داخل

ٹریٹ کارپوریشن لمیٹڈ، جو کہ ایک پاکستانی متنوع کاروباری گروپ ہے، نے تیزی سے ترقی کرنے والے پرسنل کیئر سیکٹر میں اسٹریٹجک توسیع کا اعلان کیا ہے اور دو نئے برانڈز متعارف کروائے ہیں، مردوں کے لیے جینیسس اور خواتین کے لیے ایسٹلا۔

لسٹڈ کمپنی نے یہ اعلان بدھ کو پاکستان اسٹاک ایکسچینج (پی ایس ایکس) میں نوٹس کے ذریعے کیا۔

نوٹس میں کہا گیا کہ ٹریٹ کارپوریشن لمیٹڈ اپنے شیئر ہولڈرز، سرمایہ کاروں اور اسٹیک ہولڈرز کو مطلع کرتے ہوئے خوشی محسوس کر رہی ہے کہ بورڈ آف ڈائریکٹرز نے کمپنی کی پرسنل کیئر سیکٹر میں اسٹریٹجک توسیع کی منظوری دی ہے، جو ہمارے طویل عرصے کے پروڈکٹ انوویشن اور ڈائیورسفکیشن کے سفر میں ایک اہم سنگِ میل ہے۔

اس اقدام کے تحت، ٹریٹ دو نئے برانڈز، یعنی جینیسس اور ایسٹلا، متعارف کرائے گی۔

نوٹس میں مزید کہا گیا کہ یہ برانڈز اور مصنوعات کمپنی کے اندرونِ خانہ انوویشن ڈیپارٹمنٹ کے ذریعہ تیار کی جا رہی ہیں اور ان کا مقصد مکمل رینج کے شیوئنگ، گرومنگ اور پرسنل کیئر مصنوعات فراہم کرنا ہے۔

ٹریٹ نے بتایا کہ جینیسس اور ایسٹلا کے لانچ کے ساتھ ہی وہ پرسنل کیئر اور گرومنگ کی تیزی سے بڑھتی ہوئی کیٹیگری میں اسٹریٹجک داخلہ حاصل کر رہی ہے اور اس اقدام کے ذریعے مارکیٹ شیئر میں اضافہ کی مضبوط توقع رکھتی ہے۔

کمپنی نے یہ بھی کہا کہ اس نے دونوں برانڈز کے ناموں، لوگوز، پیکیجنگ ڈیزائن اور دیگر شناختی عناصر کے لیے ٹریڈمارک رجسٹریشن حاصل کر لی ہے تاکہ مکمل پروپرائٹری حقوق اور برانڈ شناخت کو محفوظ بنایا جا سکے۔

دونوں برانڈز کا سافٹ لانچ آئندہ چند ہفتوں میں کیا جائے گا جبکہ مکمل پروڈکٹ رینج کے لیے گرینڈ لانچ ایونٹ یکم جنوری 2026 کو شیڈول ہے۔

کمپنی نے مزید کہا کہ اس اقدام کے ذریعے ٹریٹ اپنے صارفین کے لیے پروڈکٹ پورٹ فولیو کو مضبوط کرے گی، آمدنی کے ذرائع میں تنوع پیدا کرے گی اور انوویشن پر مبنی ترقی کے عزم کو مزید تقویت دے گی۔

ٹریٹ کارپوریشن لمیٹڈ 1977 میں پاکستان میں پبلک لسٹڈ کمپنی کے طور پر قائم ہوئی تھی۔ کمپنی ریزرز اور ریزر بلیڈز کی مینوفیکچرنگ اور فروخت کے ساتھ دیگر تجارتی سرگرمیوں میں بھی مصروف ہے اور اس کے پاس 75 سے زائد ایس کے یوز کی پروڈکٹ رینج موجود ہے، جس میں شیوئنگ ریزرز، باڈی ریزرز اور فیمینائن ریزرز شامل ہیں۔