اسرائیلی فضائی حملے، جنوبی لبنان میں حزب اللہ کے ہتھیاروں کے ذخائر تباہ

اسرائیلی فوج نے کہا ہے کہ اس نے اتوار کو لبنان کے جنوبی علاقے میں حزب اللہ کے ہتھیاروں کے ذخائر کو نشانہ بنایا ہے۔

اسرائیلی فوج کی جانب سے جاری بیان میں کہا گیا کہ کچھ دیر قبل آئی ڈی ایف (اسرائیلی فوج) نے حزب اللہ کے ہتھیاروں کے ذخائر کو نشانہ بنایا۔ یہ ذخائر دہشت گرد تنظیم کی جانب سے اسرائیل کے خلاف حملے کرنے کے لیے استعمال کیے جا رہے تھے۔

لبنان کی سرکاری نیشنل نیوز ایجنسی کے مطابق اسرائیل نے جنوبی لبنان کے قصبوں کفر رمان اور جرمک کے قریب متعدد فضائی حملے کیے، جبکہ ہمین کے علاقے میں ایک گھر پر ڈرون حملہ بھی کیا گیا۔

اگرچہ نومبر میں ہونے والے جنگ بندی معاہدے نے حزب اللہ اور اسرائیل کے درمیان ایک سال سے زائد جاری رہنے والی جھڑپوں کو ختم کیا تھا، تاہم اسرائیل نے لبنان پر حملے جاری رکھے ہوئے ہیں اور اس کے فوجی اب بھی لبنان کی سرحد کے اندر پانچ مختلف مقامات پر تعینات ہیں۔

دوسری جانب حزب اللہ پر غیر مسلح ہونے کے لیے شدید دباؤ ہے۔ لبنانی فوج نے ایک منصوبہ تیار کیا ہے جس کے تحت حزب اللہ کو بتدریج غیر مسلح کرنے کا عمل شروع کیا جائے گا، جس کا آغاز جنوبی لبنان سے کیا جائے گا۔

امریکہ سمیت عالمی طاقتوں کی جانب سے بھی لبنان پر دباؤ ہے کہ وہ اس معاملے پر پیش رفت کرے، جب کہ اسرائیلی حملے بھی جاری ہیں۔

تاہم ہفتے کے روز حزب اللہ کے سربراہ نعیم قاسم نے ایک اجتماع سے خطاب کرتے ہوئے کہا کہ ان کی جماعت کسی بھی صورت اپنے ہتھیار نہیں چھوڑے گی۔