امریکہ کا کولمبیا کے صدر گوستاوو پیٹرو کا ویزا منسوخ کرنے کا فیصلہ

امریکہ نے اعلان کیا ہے کہ وہ کولمبیا کے صدر گوستاوو پیٹرو کا ویزا منسوخ کرے گا، کیونکہ جمعہ کو انہوں نے نیو یارک کی سڑکوں پر فلسطینی حمایت میں مظاہرے میں حصہ لیا اور امریکی فوجیوں پر زور دیا کہ وہ صدر ڈونلڈ ٹرمپ کے احکامات کی نافرمانی کریں۔

اسٹیٹ ڈپارٹمنٹ نے ایکس پر پوسٹ کرتے ہوئے کہا کہ ہم پیٹرو کا ویزا ان کے لاپرواہ اور اشتعال انگیز اقدامات کی وجہ سے منسوخ کر دیں گے۔

کولمبیا کے صدر نے مین ہیٹن میں اقوام متحدہ کے ہیڈکوارٹر کے باہر فلسطینی حامی مظاہرین سے خطاب کرتے ہوئے عالمی مسلح فوج کے قیام کا مطالبہ کیا جس کا مقصد فلسطینیوں کو آزاد کروانا ہونا چاہیے اور کہا کہ یہ فوج امریکہ کی فوج سے بڑی ہونی چاہیے۔

انہوں نے اسپینش میں کہا کہ اسی لیے میں یہاں نیو یارک سے تمام امریکی فوجیوں سے کہتا ہوں کہ لوگوں پر اپنی بندوقیں نہ تانیں۔ ٹرمپ کے احکامات کی تعمیل نہ کریں، انسانیت کے احکامات کی پیروی کریں۔

رائٹرز نے فوری طور پر تصدیق نہیں کی کہ پیٹرو اب بھی نیو یارک میں موجود ہیں یا نہیں۔ ان کے دفتر اور کولمبیا کے وزارت خارجہ نے بھی فوری طور پر تبصرے کی درخواست کا جواب نہیں دیا۔