اسٹیٹ بینک کی مانیٹری پالیسی کمیٹی کا اجلاس آج ہوگا

اسٹیٹ بینک آف پاکستان کی مانیٹری پالیسی کمیٹی (ایم پی سی) کا اجلاس آج (پیر) منعقد ہوگا جس میں کلیدی پالیسی ریٹ کا فیصلہ کیا جائے گا۔

گزشتہ مانیٹری پالیسی اجلاس، جو 30 جون 2025 کو ہوا تھا، میں کمیٹی نے پالیسی ریٹ کو 11 فیصد پر برقرار رکھنے کا فیصلہ کیا تھا کیونکہ افراطِ زر کا منظرنامہ کچھ بگڑ گیا تھا، خاص طور پر توانائی کی قیمتوں میں توقع سے زیادہ اضافے،جو خاص کر گیس ٹیرف کی وجہ سے تھا۔

ماہرین کا خیال ہے کہ ایم پی سی اس اجلاس میں بھی پالیسی ریٹ کو برقرار رکھے گی کیونکہ حالیہ سیلاب کے باعث افراطِ زر میں اضافے کا امکان ہے۔

ٹاپ لائن سیکیورٹیز کے ایک سروے کے مطابق، 72 فیصد مارکیٹ کے شرکا کو توقع ہے کہ پالیسی ریٹ میں کوئی تبدیلی نہیں ہوگی کیونکہ حالیہ سیلاب کی وجہ سے خوراک کی مہنگائی اور مجموعی افراطِ زر میں اضافہ متوقع ہے، جبکہ فصلوں کو نقصان اور سپلائی چین کے مسائل بھی سامنے آ سکتے ہیں۔

سال 11-2010 کے سیلاب کے دوران بڑی فصلوں جیسے گندم، چاول اور کپاس کے زیر کاشت رقبے میں 3 سے 18 فیصد تک کمی آئی تھی جبکہ پاکستان اکنامک سروے کے مطابق مالی سال 2011 میں چاول کی پیداوار میں بھی 30 فیصد کمی واقع ہوئی تھی۔

اسی لیے ماہرین توقع ظاہر کر رہے ہیں کہ ایم پی سی ممکنہ طور پر حالیہ سیلاب اور بڑھتی ہوئی درآمدات کے باعث افراطِ زر کے خدشات کو دیکھتے ہوئے پالیسی ریٹ کو موجودہ سطح پر برقرار رکھے گی۔

کاپی رائٹ بزنس ریکارڈر، 2025