ٹیکسٹائل و ملبوسات کی برآمدات میں کمی، پاکستان ٹیکسٹائل کونسل کا اظہار تشویش

پاکستان ٹیکسٹائل کونسل (پی ٹی سی) نے پاکستان کی برآمدات، خصوصاً ٹیکسٹائل اور ملبوسات کے شعبے کی حالیہ گراوٹ پر شدید تشویش کا اظہار کیا ہے، حالانکہ یہ شعبہ ملک کے زرمبادلہ کے حصول میں مرکزی کردار ادا کرتا ہے۔

پی ٹی سی کی جولائی۔اگست 2025 کی ٹیکسٹائل و ملبوسات برآمدات سے متعلق تازہ ترین ماہانہ رپورٹ کے مطابق پاکستان کی کل برآمدات 5.1 ارب ڈالر رہیں، جو گزشتہ سال کی اسی مدت کے مقابلے میں محض 0.65 فیصد اضافہ ظاہر کرتی ہیں۔ تشویشناک بات یہ ہے کہ اگست 2025 میں برآمدات میں سالانہ 12.5 فیصد کمی اور ماہانہ 10 فیصد کمی ریکارڈ کی گئی، جو بیرونی تجارت میں مسلسل غیر یقینی صورتحال کو اجاگر کرتی ہے۔

ٹیکسٹائل اور ملبوسات کا شعبہ، جو پاکستان کی کل برآمدات کا تقریباً 63 فیصد ہے، نے جولائی۔اگست 2025 میں 3.21 ارب ڈالر کی برآمدات ریکارڈ کیں، جو گزشتہ سال کے مقابلے میں 10 فیصد زیادہ ہیں۔ تاہم اگست 2025 میں برآمدات کم ہو کر 1.53 ارب ڈالر رہ گئیں، جو سالانہ 7 فیصد اور ماہانہ 9 فیصد کمی کو ظاہر کرتی ہیں۔

پی ٹی سی کے مطابق تین بڑے خدشات سامنے آتے ہیں:

1 . روایتی ٹیکسٹائل (ایس ایچ 50–60): یہ شعبہ مسلسل تنزلی کا شکار ہے، مالی سال 22 میں 685 ملین ڈالر سے گر کر مالی سال 26 میں صرف 523 ملین ڈالر تک پہنچ گیا، جن میں کپاس کی برآمدات میں 3.5 فیصد اور نٹڈ فیبرکس میں 32.7 فیصد کمی ہوئی۔ 2. ویلیو ایڈڈ ٹیکسٹائل (ایچ ایس 61–63): اگرچہ یہ شعبہ طویل مدت میں بہتر کارکردگی دکھاتا رہا ہے، لیکن اگست 2025 میں اس کی برآمدات بھی گریں، جہاں نٹ ویئر، نان نٹ ملبوسات اور میڈ اپس میں مجموعی طور پر ماہانہ 13 فیصد کمی آئی۔ 3. برآمدی منڈیاں: یورپی یونین 1.3 ارب ڈالر کے ساتھ سب سے بڑی منڈی ہے، تاہم امریکہ کو برآمدات پچھلے پانچ سال سے جمود کا شکار ہیں اور 878 ملین ڈالر پر رکی ہوئی ہیں، جو مسابقت کھونے کی علامت ہے۔

پی ٹی سی نے زور دیا ہے کہ موجودہ برآمدی رجحان فوری ساختی اصلاحات کے بغیر برقرار نہیں رہ سکتا۔ کونسل نے حکومت پاکستان سے درج ذیل اقدامات فوری طور پر اپنانے کا مطالبہ کیا ہے: برآمدی صنعتوں کے لیے علاقائی طور پر مسابقتی اور پیش گوئی کے قابل توانائی نرخ، لیکویڈیٹی اور ٹیکس اصلاحات، بشمول 72 گھنٹوں میں خودکار ریفنڈ اور ان پٹس پر زیرو ریٹنگ (ای ایف ایس کے تحت)، مزدوری و اجرت پالیسیوں کو حریف ممالک سے ہم آہنگ کرنا تاکہ لاگت کی مسابقت بحال ہو، ایچ ایس 50–60 شعبوں کی معاونت، بشمول کپاس کے معیار میں بہتری اور اسپننگ/ویونگ کی لاگت میں کمی، مالی سہولیات، جیسے ایکزم بینک کو مضبوط بنانا،ای ایف ایس اور ایل ٹی ایف ایف میں توسیع، پالیسی کا استحکام، 5 سالہ ٹیکسٹائل و ملبوسات برآمداتی حکمتِ عملی کو قانونی تحفظ کے ساتھ اپنانا اور ماہانہ کے پی آئی کے ذریعے شفاف نگرانی۔

پی ٹی سی نے کہا کہ اعداد و شمار واضح دکھاتے ہیں کہ پاکستان کی برآمدات کی رفتار کمزور پڑ رہی ہے، خاص طور پر اگست 2025 میں جہاں اہم زمروں میں نمایاں کمی دیکھنے میں آئی۔ حکومت کو فوری طور پر علاقائی سطح پر مسابقتی پالیسیاں نافذ کرنی ہوں گی اور رکاوٹیں دور کرنی ہوں گی تاکہ پاکستان اپنی عالمی منڈی میں موجودگی برقرار رکھ سکے، روزگار کو تحفظ دے اور زرمبادلہ کے ذخائر کو برقرار رکھ سکے۔

کاپی رائٹ بزنس ریکارڈر، 2025