البانیا نے بدعنوانی کے خاتمے کیلئے دنیا کے مصنوعی ذہانت سے تخلیق شدہ پہلے وزیر کا تقرر کردیا

البانیا کے وزیرِاعظم ایڈی راما نے کہا ہے کہ انہوں نے دنیا کے پہلے مصنوعی ذہانت ( اے آئی) سے تخلیق شدہ سرکاری وزیر کو عوامی ٹینڈرز کی نگرانی کے لیے مقرر کیا ہے، اور وعدہ کیا ہے کہ اس کی مصنوعی ذہانت انہیں بدعنوانی سے پاک بنا دے گی۔

اپنی سوشلسٹ پارٹی کے اجلاس میں مئی کے بڑے انتخابی فتح کے بعد اپنی نئی کابینہ پیش کرتے ہوئے، ایڈی راما نے اس نئے رکن کو متعارف کرایا جس کا نام دیلا ہے — جو البانوی زبان میں سورج کے معنی رکھتا ہے۔

ایڈی راما نے کہا کہ دیلا پہلی (سرکاری) رکن ہے جو جسمانی طور پر موجود نہیں ہے بلکہ مصنوعی ذہانت کے ذریعے ورچوئلی تخلیق کی گئی ہے۔

انہوں نے مزید کہا کہ دیلا کو عوامی ٹینڈرز پر تمام فیصلوں کی ذمہ داری سونپی جائے گی، اور انہیں سو فیصد بدعنوانی سے پاک بنایا جائے گا اور ہر وہ عوامی فنڈ جو ٹینڈر کے طریقہ کار میں پیش کیا جائے گا بالکل شفاف ہوگا۔

دیلا کو جنوری میں ایک مصنوعی ذہانت سے چلنے والے ورچوئل اسسٹنٹ کے طور پر لانچ کیا گیا تھا — جو روایتی البانوی لباس پہنے ایک عورت جیسی نظر آتی ہے — تاکہ لوگوں کو سرکاری ای-البانیا پلیٹ فارم استعمال کرنے میں مدد ملے جو دستاویزات اور خدمات فراہم کرتا ہے۔ سرکاری اعداد و شمار کے مطابق اب تک اس نے 36,600 ڈیجیٹل دستاویزات جاری کرنے میں مدد دی ہے اور تقریباً 1,000 خدمات اس پلیٹ فارم کے ذریعے فراہم کی ہیں۔

ایڈی راما، جنہوں نے انتخابات میں چوتھی بار اقتدار حاصل کیا ہے، آنے والے دنوں میں اپنی نئی کابینہ کو قانون سازوں کے سامنے پیش کرنے والے ہیں۔

عوامی انتظامیہ میں بدعنوانی کے خلاف جنگ البانیا کی یورپی یونین میں شمولیت کی کوششوں میں ایک اہم معیار ہے۔

ایڈی راما کی خواہش ہے کہ وہ 2030 تک 2.8 ملین آبادی والے اس بالکانی ملک کو سیاسی اتحاد میں شامل کرائیں۔