ایپل واچ ہائی بلڈ پریشر کی تشخیض کے نئے فیچر کے ساتھ آئندہ ہفتے متعارف کرائی جائیگی،بلومبرگ

بلومبرگ نیوز نے رپورٹ کیا ہے کہ ایپل آئندہ ہفتے اپنی اسمارٹ واچ میں ہائی بلڈ پریشر (ہائپرٹینشن) کی تشخیص کی سہولت متعارف کرائے گا، جب کہ اسے جمعرات کے روز امریکی فوڈ اینڈ ڈرگ ایڈمنسٹریشن (ایف ڈی اے) سے منظوری مل گئی ہے۔

ایپل اور ایف ڈی اے نے رائٹرز کی جانب سے تبصرے کی درخواست کا فوری جواب نہیں دیا۔

کمپنی نے 9 ستمبر کے ایونٹ میں اپنی نئی ایپل واچ میں بلڈ پریشر مانیٹر متعارف کرایا تھا، جہاں اس نے آئی فون کی تازہ ترین لائن اپ بھی لانچ کی تھی، جس میں زیادہ پتلا آئی فون ایئر شامل تھا۔

یہ فیچر، جو ریگولیٹری منظوری کے بعد دستیاب ہو گا، ہائی بلڈ پریشر کے ہر کیس کی نشاندہی نہیں کرے گا، تاہم ایپل کے مطابق یہ تقریباً 10 لاکھ افراد کو خبردار کرنے میں مددگار ثابت ہو سکتا ہے۔

بلومبرگ کی رپورٹ کے مطابق یہ ٹول 150 ممالک میں دستیاب ہو گا اور گھڑی کے آپٹیکل ہارٹ سینسر سے حاصل ہونے والے ڈیٹا کے ذریعے یہ ٹریک کرے گا کہ 30 دن کے دوران دل کی دھڑکن پر خون کی شریانیں کس طرح ردعمل ظاہر کرتی ہیں۔

یہ سہولت ایپل واچ سیریز 9، سیریز 10، سیریز 11 اور مہنگی الٹرا 2 اور الٹرا 3 اسمارٹ واچز پر دستیاب ہو گی۔