گلگت میں برفانی جھیل پھٹنے سے متعدد دیہات زیرِ آب آگئے

گلگت بلتستان کے ضلع غذر میں برفانی جھیل پھٹنے (جی ایل او ایف) کے باعث متعدد دیہات زیرِ آب آگئے ہیں، صوبائی حکومت کے ترجمان فیض اللہ فراق نے جمعہ کو واقعہ کی تصدیق کی ہے۔

انہوں نے بتایا کہ سیلاب کے باعث عوام کو بھاری مالی نقصان پہنچا ہے تاہم خوش قسمتی سے کوئی جانی نقصان نہیں ہوا۔ گلیشیئر پھٹنے کا واقعہ غذر کی تحصیل گوپس کے علاقے تلی داس میں پیش آیا۔

ترجمان کے مطابق اگرچہ دریا کے بہاؤ کو روک دیا گیا ہے لیکن مزید نقصانات کا خدشہ برقرار ہے۔پانی جھیل کی شکل اختیار کرچکا ہے، جس سے قریبی مزید دیہات کے ڈوبنے کا خطرہ بڑھ گیا ہے۔

انہوں نے بتایا کہ گلیشیئر پھٹنے کے باعث پھنسے ہوئے 50 سے زائد افراد کو ریسکیو کر لیا گیا ہے جبکہ امدادی کارروائیاں تاحال جاری ہیں۔ اس موقع پر ضلعی انتظامیہ، ریسکیو 1122 اور ڈیزاسٹر مینجمنٹ کے حکام موجود ہیں۔

صوبائی ترجمان نے بتایا کہ گلگت بلتستان کے وزیراعلیٰ حاجی گلبر خان ہنگامی بنیادوں پر غذر روانہ ہوگئے ہیں، جہاں وہ متاثرہ علاقوں کا معائنہ کریں گے اور امدادی سرگرمیوں کا جائزہ لیں گے۔ وزیراعلیٰ متاثرین اور جاں بحق افراد کے ورثا سے ملاقات کر کے اظہارِ افسوس بھی کریں گے۔

فیض اللہ فراق نے مزید کہا کہ وزیراعلیٰ کو غذر کی انتظامیہ سیلاب سے ہونے والی تباہ کاریوں پر بریفنگ دے گی۔

انہوں نے بتایا کہ وزیراعلیٰ نے متاثرہ علاقوں میں ریسکیو آپریشن کو مزید تیز کرنے کی ہدایت دی ہے۔ دریں اثناء متاثرہ حصوں میں ادویات، کمبل، خیمے اور اشیائے خوردونوش بھی پہنچا دی گئی ہیں۔