وزیر خزانہ نے بڑی امریکی سرمایہ کاری کا اشارہ دیدیا

وفاقی وزیر خزانہ محمد اورنگزیب نے پیر کو کامیاب تجارتی مذاکرات کے بعد پاکستان کے مختلف شعبوں میں امریکہ کی جانب سے بڑی سرمایہ کاری کا اشارہ دیا ہے۔

امریکہ سے واپس آنے پر ایک غیر رسمی گفتگو میں محمد اورنگزیب نے کہا کہ پاکستان جلد ہی امریکہ کی جانب سے مختلف شعبوں میں خاطرخواہ سرمایہ کاری کی حوصلہ افزا خبریں سنے گا۔

وزیر خزانہ نے بتایا کہ اپنی دورے کے دوران پاکستان نے تجارتی مذاکرات کے سلسلے میں اہم اجلاسوں میں نمایاں کامیابی حاصل کی، جسے امریکی انتظامیہ نے بہت سراہا۔

انہوں نے امریکہ کے ساتھ تجارتی مذاکرات کو ملک کے لیے ایک بڑی کامیابی قرار دیا اور کہا کہ پاکستان صحیح سمت میں گامزن ہے اور اس کے مثبت نتائج جلد سامنے آئیں گے۔

محمد اورنگزیب نے معاشی بہتری کے لیے طویل المدتی فیصلے کرنے کی ضرورت پر زور دیا اور مذاکرات کے باہمی کامیاب نتیجے پر اطمینان کا اظہار کیا۔

امریکہ اور پاکستان نے ایک تجارتی معاہدے کا خیرمقدم کیا ہے، جسے اسلام آباد نے کم ٹیرف اور بڑھتی ہوئی سرمایہ کاری کا باعث قرار دیا، مگر پاکستانی برآمدات پر عائد کیے جانے والے ٹیرف کی مقدار ظاہر نہیں کی گئی۔

پاکستان کے وزارت خزانہ نے واشنگٹن میں مذاکرات کے آخری دور کے بعد جاری بیان میں کہا کہ یہ معاہدہ خاص طور پر توانائی، کان کنی و معدنیات، آئی ٹی، کرپٹو کرنسی اور دیگر شعبوں میں اقتصادی تعاون کے نئے دور کا آغاز ہے۔

پاکستان کو ابتدائی طور پر 29 فیصد ٹیرف کا سامنا تھا، جو بعد میں دیگر ممالک کی طرح معطل کر دیا گیا تاکہ یکم اگست کی ڈیڈ لائن تک تجارتی مذاکرات ہو سکیں۔ اسلام آباد کا ہدف تھا کہ اسے علاقائی تجارتی حریفوں جیسے ویتنام (جس پر ٹرمپ کی حکومت نے 20 فیصد ٹیرف عائد کیا تھا) اور بھارت (جس پر 25 فیصد ٹیرف کے خدشات ہیں) کی نسبت کم ٹیرف حاصل ہو۔