اسٹیٹ بینک آف پاکستان (ایس بی پی) اور سیکورٹیز اینڈ ایکسچینج کمیشن آف پاکستان( ایس ای سی پی ) کی رابطہ کمیٹی کا 33 واں اجلاس ایس ای سی پی کے ہیڈ آفس میں منعقد ہوا۔
ایس ای سی پی کی جانب سے جاری اعلامیہ کے مطابق ایس بی پی اورایس ای سی پی رابطہ کمیٹی پاکستان کے دو اہم مالیاتی اداروں کے درمیان حکمتِ عملی پر مبنی مشاورت اور ریگولیٹری ہم آہنگی کے لیے ایک اعلیٰ سطح کا فورم ہےجس کا مقصد باہمی تعاون کا استحکام، پالیسیوں میں ہم آہنگی اور مالیاتی نظام کی ترقی و استحکام کے لیے مشترکہ اقدامات کا فروغ ہے۔
گورنر اسٹیٹ بینک آف پاکستان جمیل احمد نے ایس ای سی پی کے دورے کے موقع پر حکومت کے لیے کیپٹل مارکیٹ کو ایک متبادل اور پائیدار مالیاتی ذریعہ بنانے کی اہمیت پر زور دیا۔
انہوں نے کہا کہ اس طریقہ کار سے بینک نجی شعبے کی مالی معاونت پر زیادہ توجہ دے سکیں گے جو معاشی ترقی کے لیے مددگار ہوگا۔
انہوں نے مارکیٹ کے بنیادی ڈھانچے کی ترقی میں ایس ای سی پی کی کاوشوں کو سراہا اور اصلاحات میں مشترکہ تعاون کے لیے اسٹیٹ بینک کے عزم کا اعادہ کیا۔
ایس ای سی پی کے چیئرپرسن عاکف سعید نے کہا کہ پاکستان کی سرمایہ مارکیٹ کو مضبوط بنانے میں بینکوں کا اہم کردار ہے۔
انہوں نے زور دیا کہ اگر بینک سرمایہ مارکیٹ کے اداروں سے قریبی رابطہ اور تعاون کریں تو وہ دستیاب مواقع سے فائدہ اٹھا کر مارکیٹ اور معیشت کو آگے بڑھا سکتے ہیں۔
اجلاس میں کیپٹل مارکیٹ میں ڈیجیٹل ادائیگیوں کی شمولیت، ریگولیٹری مقصد کے لیے کریڈٹ معلومات تک آسان رسائی اور پرانے کریڈٹ ڈیٹا کے مسائل کے حل کا جائزہ لیا گیا۔
کمیٹی نے نئی مالیاتی مصنوعات، مشترکہ ڈیجیٹل نظام اور نئے شعبوں میں ریگولیٹری ہم آہنگی پر ہونے والی پیش رفت کا بھی جائزہ لیا۔دونوں اداروں نے ایک مضبوط، جامع اور ٹیکنالوجی پر مبنی مالیاتی نظام کی تعمیر کے لیے باہمی تعاون جاری رکھنے کے عزم کا اعادہ بھی کیا۔
Comments
Comments are closed.