بارشوں اور سیلاب سے ابتک 299 افراد جاں بحق، 715 زخمی ہوئے، این ڈی ایم اے

جون 26 سے جاری شدید بارشوں اور اچانک سیلابوں کے باعث پاکستان کے مختلف علاقوں میں اب تک 299 افراد جان کی بازی ہار چکے ہیں، جن میں 140 بچے شامل ہیں، جبکہ 715 افراد زخمی ہوئے ہیں جن میں 239 بچے شامل ہیں۔ یہ اعداد و شمار نیشنل ڈیزاسٹر مینجمنٹ اتھارٹی (این ڈی ایم اے) کی تازہ رپورٹ میں جاری کیے گئے ہیں۔

این ڈی ایم اے کے مطابق جاں بحق ہونے والوں میں 140 بچے، 102 مرد اور 57 خواتین شامل ہیں۔ زخمیوں میں 239 بچے، 204 خواتین اور 272 مرد شامل ہیں۔ ان تباہ کن بارشوں اور سیلابوں نے مجموعی طور پر 1,676 گھروں کو نقصان پہنچایا، جن میں سے 562 مکمل طور پر تباہ ہو گئے جبکہ 1,114 کو جزوی نقصان پہنچا۔ اس کے علاوہ 428 مویشی بھی ہلاک ہوئے، جس سے مقامی آبادی کو مزید نقصان کا سامنا کرنا پڑا۔

این ڈی ایم اے نے اب تک 223 بڑے پیمانے پر ریسکیو آپریشنز مکمل کیے ہیں، جن کے ذریعے 2,880 افراد کو محفوظ مقامات پر منتقل کیا گیا۔ متاثرہ علاقوں میں امدادی سرگرمیوں کے تحت 13,466 اشیائے ضروریہ تقسیم کی گئی ہیں، جن میں 1,999 خیمے، 61 راشن بیگز، 958 کمبل، 569 رضائیاں، 613 گدے، 1,282 کچن سیٹس، 1,163 فوڈ پیکٹس، 350 لائف جیکٹس، 1,122 ہائیجین ہوم کٹس، 2,170 ترپالیں اور 146 ڈی واٹرنگ پمپس شامل ہیں۔

علاوہ ازیں، متاثرہ علاقوں میں 71 میڈیکل کیمپس قائم کیے گئے ہیں جہاں اب تک 577 افراد کا علاج کیا جا چکا ہے۔ این ڈی ایم اے کے مطابق یہ بحران ملک کے کئی علاقوں کو متاثر کر چکا ہے اور وفاقی و صوبائی اداروں کے اشتراک سے امدادی سرگرمیاں جاری ہیں۔