سرحد پار خطرات اور پیچیدہ سکیورٹی چیلنجز کے اس دور میں پاکستان نے خطے میں گہرے تعاون، اسٹریٹجک مکالمہ اور باہمی اعتماد کو فروغ دینے کے اپنے عزم کا اعادہ کیا ہے۔ یہ پیغام چیف آف آرمی اسٹاف فیلڈ مارشل سید عاصم منیر، این آئی(ایم) نے ہفتہ کے روز اسلام آباد میں ریجنل چیفس آف ڈیفنس اسٹاف کانفرنس کی میزبانی کے دوران اجاگر کیا۔
اعلیٰ سطح اس کانفرنس میں امریکہ، قازقستان، کرغیزستان، تاجکستان اور ازبکستان کی اعلیٰ عسکری قیادت نے شرکت کی۔ ”باہمی رشتے مضبوط بنائیں، امن قائم رکھیں“ کے عنوان سے منعقدہ اس اجلاس کا مقصد کثیرالجہتی عسکری تعاون کو فروغ دینا، مشترکہ تربیتی اقدامات کو آگے بڑھانا اور انسداد دہشت گردی و دیگر سکیورٹی شعبوں میں بہترین تجربات کا تبادلہ کرنا تھا۔
مہمان وفود کا خیرمقدم کرتے ہوئے آرمی چیف نے خطے کے پرامن اور مستحکم مستقبل کے لیے پاکستان کے وژن کو دہرایا۔ انہوں نے کہا کہ پاکستان شراکت دار ممالک کے ساتھ تعاون کے ذریعے محفوظ اور خوشحال علاقائی ماحول کی تشکیل کے لیے پرعزم ہے۔ انہوں نے ابھرتے ہوئے ہائبرڈ وارفیئر خطرات اور خطے کی بدلتی حرکیات کے پیش نظر عسکری تعلقات کو مزید مستحکم کرنے کی ضرورت پر زور دیا۔
کانفرنس میں خطے کی سکیورٹی، وسطی اور جنوبی ایشیا کے اسٹریٹجک منظرنامے، اور دہشت گردی، سائبر عدم تحفظ اور پرتشدد انتہاپسندی سے نمٹنے کے لیے مربوط کوششوں کی اہمیت پر تفصیلی تبادلہ خیال کیا گیا۔ شرکا نے علاقائی بحرانوں اور قدرتی آفات کے دوران انسانی بنیادوں پر ردعمل کو بہتر بنانے پر بھی آرا کا تبادلہ کیا۔
وفود نے اجتماعی طور پر امن کے قیام، قومی خودمختاری کے احترام اور مشترکہ سکیورٹی چیلنجز سے متحدہ کوششوں کے ذریعے نمٹنے کے عزم کا اعادہ کیا۔ انہوں نے شمولیتی دفاعی سفارتکاری کے فروغ میں پاکستان کی قیادت کو سراہا اور ملک کی میزبانی اور انتظامی کردار کی تعریف کی۔
اجلاس میں شریک ممالک نے اس بات پر اتفاق کیا کہ دفاعی تعاون میں اضافہ خطے کے امن و استحکام کے لیے ناگزیر ہے۔ کانفرنس کا اختتام اس عہد کے ساتھ ہوا کہ اسٹریٹجک روابط کو جاری رکھا جائے گا، مشترکہ صلاحیتوں کو بڑھایا جائے گا اور سرحدوں کے پار اعتماد و تعاون کے رشتوں کو مزید مستحکم کیا جائے گا۔
کاپی رائٹ بزنس ریکارڈر، 2025
Comments
Comments are closed.