بابرعلی فاؤنڈیشن اور آئی جی آئی انویسٹمنٹس نے مچلز فروٹ فارمز میں اپنے شیئرز فروخت دئیے

مچلز فروٹ فارمز لمیٹڈ (ایم ایف ایف ایل) کے اہم اسٹیک ہولڈرز، جن میں کمپنی کے چیئرمین سید بابر علی کی قائم کردہ بابرعلی فاؤنڈیشن اور آئی جی آئی انویسٹمنٹس (پرائیویٹ) لمیٹڈ شامل ہیں، نے اپنی پوری حصص ملکیت سی سی ایل ہولڈنگ (پرائیویٹ) لمیٹڈ کو فروخت کر دی ہے۔

آئی جی آئی ہولڈنگز، جو آئی جی آئی انویسٹمنٹس کی پیرنٹ کمپنی ہے، نے بدھ کے روز پاکستان اسٹاک ایکسچینج (پی ایس ایکس) کو دیے گئے نوٹس میں اس پیشرفت سے آگاہ کیا۔

نوٹس میں کہا گیا کہ 23 جولائی 2025 کو کمپنی کے ایک بڑے شیئر ہولڈر یعنی بابرعلی فاؤنڈیشن سے اطلاع موصول ہوئی ہے کہ فاؤنڈیشن اور اس کے بورڈ آف گورنرز کے اراکین نے مچلز فروٹ فارمز لمیٹڈ (مچلز) میں اپنی بالترتیب 2.43 فیصد اور 0.70 فیصد حصص ملکیت سی سی ایل ہولڈنگ (پرائیویٹ) لمیٹڈ کو فی شیئر 232.75 روپے کی طے شدہ قیمت پر فروخت کر دی ہے۔

اسی طرح، آئی جی آئی انویسٹمنٹس نے بھی اپنی مکمل 3.72 فیصد حصص ملکیت سی سی ایل ہولڈنگ (پرائیویٹ) لمیٹڈ کو 23 جولائی 2025 کو اسی طے شدہ قیمت پر فروخت کر دی ہے، جو کارپوریٹ اور ریگولیٹری منظوریوں کے تحت ہے۔

سی سی ایل ہولڈنگ، سی سی ایل فارماسیوٹیکلز (پرائیویٹ) لمیٹڈ کی ہولڈنگ کمپنی ہے، جو بنیادی طور پر برانڈڈ جینرک فارماسیوٹیکلز اور کنزیومر ہیلتھ پروڈکٹس کی تیاری اور مارکیٹنگ میں مصروف ہے۔

دریں اثنا، مچلز فروٹ فارمز لمیٹڈ، جو پاکستان میں زرعی اور کنفیکشنری مصنوعات تیار کرنے والی کمپنی ہے، کی تاریخ 1933 سے شروع ہوتی ہے۔ آزادی کے بعد کمپنی کا نام انڈین ملڈورا فروٹ فارمز سے تبدیل ہو کر مچلز فروٹ فارمز لمیٹڈ رکھا گیا۔

کمپنی نے 1993 میں پبلک لسٹنگ کی اور 1996 میں اسٹاک ایکسچینج میں درج ہوئی۔ اس کی بنیادی سرگرمی میں زرعی اور کنفیکشنری مصنوعات جیسے مشروبات، کیچپ اور ساسز، پریزروز، ریڈی ٹو کک اور ریڈی ٹو ایٹ فوڈ رینج کی تیاری اور فروخت شامل ہیں۔

یاد رہے کہ مئی میں ایم ایف ایف ایل نے سی سی ایل ہولڈنگ (پرائیویٹ) لمیٹڈ کے ساتھ ایک شیئر پرچیز ایگریمنٹ کیا تھا۔