کیا آج کراچی میں بارش ہوگی؟

کراچی میں بارشوں کا ایک اور سلسلہ شروع ہونے والا ہے جو پیر تک جاری رہنے کا امکان ہے۔

محکمہ موسمیات کے مطابق ہفتے کو شہر کا موسم زیادہ تر ابر آلود رہے گا اور مختلف علاقوں میں ہلکی سے درمیانے درجے کی بارش ہو سکتی ہے۔ اتوار کو گرج چمک کے ساتھ طوفانی بارش کی پیش گوئی کی گئی ہے جب کہ مطلع سارا دن ابر آلود رہے گا۔

پیر کو بوندا باندی کا امکان ہے اور موسم جزوی طور پر ابر آلود رہے گا۔

یاد رہے کہ کراچی میں رواں سال کی پہلی مون سون بارش 26 جون کو ہوئی تھی، جس کے دوران شہر کے مختلف علاقوں میں درمیانے سے لے کر شدید درجے کی بارش ریکارڈ کی گئی۔

شہر میں ہر بار تیز بارش کے بعد اہم سڑکیں زیرِآب آجاتی ہیں، نکاسی آب کے نظام پر دباؤ بڑھ جاتا ہے، اور گٹر اُبلنے لگتے ہیں، جس سے شہریوں کو سخت مشکلات کا سامنا کرنا پڑتا ہے۔ ان مسائل سے نمٹنے کے لیے مقامی حکومت کی تیاریوں کے بارے میں جاننے کے لیے میئر کراچی مرتضیٰ وہاب سے متعدد بار رابطے کی کوشش کی گئی، تاہم اُن کی جانب سے کوئی جواب موصول نہیں ہوا۔

محکمہ موسمیات نے سندھ کے دیگر اضلاع کے لیے بھی بارش، تیز ہواؤں اور گرج چمک کے ساتھ بارش کی پیش گوئی کی ہے۔ متاثرہ علاقوں میں میرپور خاص، مٹھی، تھرپارکر، بدین، سجاول، عمرکوٹ، چھاچھرو، پڈعیدن، خیرپور، ٹھٹھہ، گھوٹکی، چھور، سکھر، کشمور، شکارپور، جیکب آباد، لاڑکانہ، نوشہرو فیروز، سانگھڑ، دادو، حیدرآباد، ٹنڈو الٰہ یار، ٹنڈو محمد خان، مٹیاری اور شہید بینظیر آباد شامل ہیں، جہاں بعض مقامات پر موسلا دھار بارش کا امکان ہے۔

محکمہ موسمیات نے خبردار کیا ہے کہ شدید بارش نچلے علاقوں، خصوصاً سندھ کے بالائی حصوں میں، شہری سیلاب اور پانی جمع ہونے کا باعث بن سکتی ہے۔ اس دوران تیز ہواؤں، آندھی اور بجلی گرنے سے روزمرہ معمولات متاثر ہونے، اور کچے گھروں، بجلی کے کھمبوں، بل بورڈز، گاڑیوں اور سولر پینلز کو نقصان پہنچنے کا اندیشہ بھی ظاہر کیا گیا ہے۔

مزید برآں، پی ایم ڈی نے کسانوں کو مشورہ دیا ہے کہ وہ تازہ ترین موسمی پیش گوئی کو مدنظر رکھتے ہوئے اپنی زرعی سرگرمیوں کی منصوبہ بندی کریں۔