پیٹرولیم مصنوعات کی قیمتوں میں اضافہ متوقع

پاکستان میں پیٹرول اور ڈیزل کی قیمتوں میں آئندہ 15 دنوں کے لیے، یعنی 16 جولائی 2025 سے، فی لیٹر 6.60 روپے (2.5 فیصد) تک اضافے کا امکان ہے۔ یہ اندازہ پٹرولیم انڈسٹری کے تخمینے پر مبنی ہے۔

تخمینے کے مطابق، پیٹرول کی قیمت میں 6.60 روپے فی لیٹر اور ہائی اسپیڈ ڈیزل (ایچ ایس ڈی) کی قیمت میں 5.27 روپے (1.9 فیصد) اضافہ متوقع ہے۔ تاہم دیگر پٹرولیم مصنوعات، جیسا کہ مٹی کا تیل اور لائٹ ڈیزل آئل (ایل ڈی او)، میں بالترتیب 3.74 روپے (2 فیصد) اور 2.23 روپے (1.3 فیصد) فی لیٹر کمی کا امکان ظاہر کیا گیا ہے۔

یہ تخمینے پیٹرول پر 78.02 روپے فی لیٹر اور ایچ ایس ڈی پر 77.01 روپے فی لیٹر پٹرولیم لیوی (پی ایل) اور کاربن سرچارج لیوی (سی ایس ایل) کی بنیاد پر تیار کیے گئے ہیں۔ ان لینڈ فریٹ ایکوالائزیشن مارجن (آئی ایف ای ایم) پیٹرول پر 8.89 روپے اور ایچ ایس ڈی پر 6.04 روپے فی لیٹر فرض کیا گیا ہے۔ شرح مبادلہ کی ایڈجسٹمنٹ پیٹرول پر 3 روپے اور ایچ ایس ڈی پر 2 روپے فی لیٹر لگائی گئی ہے۔

تخمینے کے مطابق، پیٹرول پر عالمی مارکیٹ کا پریمیم 9.68 ڈالر فی بیرل اور ایچ ایس ڈی پر 3.25 ڈالر فی بیرل ہے۔

آئل اینڈ گیس ریگولیٹری اتھارٹی (اوگرا) 15 جولائی کو عالمی منڈی کے رجحانات اور بجٹ میں طے کردہ پیٹرولیم لیوی و کاربن ٹیکس کے اہداف کی روشنی میں اپنی حتمی سفارشات تیار کرے گی، جس کے بعد وزارت خزانہ نئی قیمتوں کا اعلان کرے گی۔

اگر انڈسٹری کے یہ تخمینے نافذ ہوتے ہیں تو پیٹرول کی قیمت 266.79 روپے فی لیٹر سے بڑھ کر 273.39 روپے فی لیٹر ہو جائے گی، جبکہ ایچ ایس ڈی کی قیمت 272.98 روپے سے بڑھ کر 278.25 روپے فی لیٹر ہو سکتی ہے۔

واضح رہے کہ یکم جولائی کو حکومت نے عالمی مارکیٹ میں ایران-اسرائیل جنگ کے باعث قیمتوں میں اتار چڑھاؤ کا حوالہ دیتے ہوئے پیٹرول اور ڈیزل کی قیمتوں میں نمایاں اضافہ کیا تھا۔ اوگرا کی سفارش پر پیٹرول 8.36 روپے بڑھا کر 266.79 روپے اور ڈیزل 10.39 روپے بڑھا کر 272.98 روپے فی لیٹر مقرر کیا گیا تھا۔

پاکستان اپنی پیٹرولیم ضروریات کا تقریباً 85 فیصد ریفائن شدہ پیٹرول درآمد کرتا ہے جبکہ 15 فیصد خام تیل کی صورت میں درآمد کی جاتی ہے۔

کاپی رائٹ بزنس ریکارڈر، 2025