دیوان فاروق موٹرز نے 300 کلومیٹر رینج کی الیکٹرک گاڑیوں کی تیاری شروع کر دی

دیوان فاروق موٹرز لمیٹڈ (ڈی ایف ایم ایل) نے 300 کلومیٹر رینج کے الیکٹرک وہیکلز (ای ویز) کی تیاری اور اسمبلنگ کا آغاز کر دیا ہے، جو کہ ایکو-گرین موٹرز لمیٹڈ (ای جی ایم ایل) کے لیے کیے جانے والے پہلے معاہدے کے تحت 200 کلومیٹر رینج کے الیکٹرک وہیکل کی پیداوار میں توسیع ہے۔

کمپنی نے یہ پیش رفت جمعرات کو پاکستان اسٹاک ایکسچینج (پی ایس ایکس) کو دیے گئے اپنے نوٹس میں شیئر کی۔

نوٹس میں کہا گیا کہ ہم یہ بتاتے ہوئے خوشی محسوس کر رہے ہیں کہ 200 کلومیٹر رینج کی الیکٹرک گاڑیوں کے علاوہ، دیوان فاروق موٹرز لمیٹڈ نے اب 300 کلومیٹر رینج کی الیکٹرک گاڑیوں کی تیاری اور اسمبلنگ کا آغاز کر دیا ہے، جو کہ ایکو-گرین موٹرز لمیٹڈ کے لیے بنائی جا رہی ہیں۔

اس پیش رفت کے بعد ڈی ایف ایم ایل کے حصص کی قیمت بڑھ کر روپے 36.89 ہو گئی، جو اس رپورٹ کے وقت تک 0.72 روپے کا اضافہ ظاہر کرتی ہے۔

بدھ کے روز ڈی ایف ایم ایل نے اعلان کیا تھا کہ اس نے چین کی تیار کردہ الیکٹرک گاڑی ’ہونری-وی ای‘ کے 300 سے زائد یونٹس گزشتہ دس ماہ کے دوران اپنے اسمبلنگ پلانٹ میں تیار کیے ہیں، جب سے کمپنی نے الیکٹرک وہیکل کی مقامی تیاری شروع کی ہے۔

ستمبر 2024 میں، کمپنی نے انجینئرنگ ڈویلپمنٹ بورڈ (ای ڈی بی) سے منظوری حاصل کرنے کے بعد الیکٹرک وہیکل کی پیداوار کا آغاز کیا تھا۔

جون 2023 میں، کمپنی نے اعلان کیا تھا کہ اس نے ایکو-گرین موٹرز لمیٹڈ کے ساتھ ایک ٹول مینوفیکچرنگ معاہدہ کیا ہے، جس کے تحت وہ ایکو-گرین موٹرز لمیٹڈ کی گاڑی ہونری-وی ای کی تیاری کرے گی۔

ٹول مینوفیکچرنگ معاہدے کے تحت ایک کمپنی ڈیزائن یا پراڈکٹ آئیڈیا کی مالک ہوتی ہے اور دوسری کمپنی کو وہ مواد فراہم کرتی ہے تاکہ وہ پراڈکٹ یا اس کے حصے تیار کرے۔

دیوان فاروق موٹرز لمیٹڈ 28 دسمبر 1998 کو پاکستان میں بطور پبلک لمیٹڈ کمپنی شامل کی گئی تھی، اور یہ ملک میں گاڑیوں کی اسمبلنگ، تیاری اور فروخت کے کاروبار سے وابستہ ہے۔