قومی توانائی ریگولیٹری اتھارٹی (نیپرا) نے بدھ کے روز کے الیکٹرک کی اپریل 2025 کے لیے عبوری ماہانہ فیول چارجز ایڈجسٹمنٹ (ایف سی اے) کی درخواست پر فیصلہ جاری کرتے ہوئے صارفین کو 4.0349 روپے فی یونٹ ریلیف دینے کا اعلان کیا ہے۔
کے الیکٹرک کے جاری کردہ بیان کے مطابق یہ ریلیف جولائی 2025 کے بجلی بلوں میں صارفین کو منتقل کیا جائے گا۔
مزید برآں نیپرا نے اپنی جانب سے 0.8 ارب روپے کی رقم کو جزوی لوڈ، اوپن سائیکل، ڈیگریڈیشن کرفز اور اسٹارٹ اپ لاگت کے سلسلے میں عارضی طور پر روک لیا ہے۔ یہ اقدام کے الیکٹرک کے زیر التوا دعوؤں کے خلاف ایڈجسٹمنٹ کے لیے کیا گیا ہے تاکہ مستقبل میں صارفین پر اضافی بوجھ نہ پڑے۔
واضح رہے کہ فیول چارجز ایڈجسٹمنٹ کا اطلاق بجلی بنانے میں استعمال ہونے والے ایندھن کی بین الاقوامی قیمتوں میں ردوبدل اور پیداواری مرکب کی تبدیلیوں کے باعث ہوتا ہے، جس کا بوجھ صارفین پر نیپرا کی جانچ اور منظوری کے بعد بلوں میں شامل کیا جاتا ہے۔
صارفین کو عالمی سطح پر ایندھن کی قیمتوں میں کمی کی صورت میں منفی فیول چارجز ایڈجسٹمنٹ (FCA) کی صورت میں بھی بلوں میں ریلیف حاصل ہوتا ہے۔ صارفین سے وصول کی جانے والی فیول ایڈجسٹمنٹ کی شرح نیپرا طے کرتا ہے اور وفاقی حکومت اس کی باقاعدہ منظوری دیتی ہے۔
ریگولیٹری اتھارٹی کے فیصلے کے مطابق یہ ایف سی اے تمام صارفین پر لاگو ہو گی، سوائے درج ذیل کیٹیگریز کے:لائف لائن صارفین، گھریلو محفوظ (پروٹیکٹڈ) صارفین،الیکٹرک وہیکل چارجنگ اسٹیشنز (ای وی سی ایس) اور وہ تمام صارفین جنہوں نے پری پیڈ ٹیرف کا انتخاب کیا ہے۔
Comments
Comments are closed.