بلوچستان: ضلع دکی میں ’ فتنتہ الہندوستان ’ کے 2 دہشت گرد ہلاک، 2 کو گرفتار کرلیا گیا، آئی ایس پی آر

پاک فوج کے شعبۂ تعلقات عامہ (آئی ایس پی آر) کے مطابق 28 جون 2025 کو بلوچستان کے ضلع دکی میں دہشت گردوں کی موجودگی کی اطلاع پر ایک کامیاب کارروائی کی گئی ہے جس میں دو دہشت گردوں کو ہلاک اور دو دیگر کو گرفتار کرلیا گیا ہے۔

بیان میں کہا گیا ہے کہ کارروائی کے دوران بھارت کے حمایت یافتہ گروہ ’ فتنتہ الہندوستان ’ سے تعلق رکھنے والے دہشت گردوں کے ٹھکانے کو موثر طور پر نشانہ بنایا گیا۔ شدید فائرنگ کے تبادلے کے دوران دو بھارتی حمایت یافتہ دہشت گرد جہنم واصل کر دیے گئے جبکہ دو دہشت گردوں کو گرفتار کر لیا گیا ہے۔

آئی ایس پی آر کے مطابق یہ آپریشن پاکستان کی خودمختاری، امن و استحکام کے تحفظ کے عزم کا مظہر ہے۔

بیان میں کہا گیا ہے کہ ہلاک اور گرفتار کیے گئے بھارت کے حمایت یافتہ دہشت گردوں کے قبضے سے اسلحہ، گولہ بارود اور دھماکا خیز مواد بھی برآمد کیا گیا ہے۔ یہ دہشت گرد علاقے میں متعدد تخریبی کارروائیوں میں ملوث رہے تھے۔

بیان میں مزید کہا گیا کہ علاقے میں ممکنہ طور پر موجود دیگر دہشت گردوں کی تلاش اور صفایا کرنے کے لیے کلیئرنس (سینیٹائزیشن) آپریشن جاری ہے۔

آئی ایس پی آر نے واضح کیا ہے کہ پاکستان کی سیکورٹی فورسز ملک کو بھارت کی پشت پناہی میں ہونے والی دہشت گردی سے مکمل طور پر پاک کرنے کے لیے پرعزم ہیں اور قوم کے اس غیر متزلزل عزم کا اعادہ کیا کہ دہشت گردی میں ملوث عناصر کو انصاف کے کٹہرے میں لایا جائے گا۔