یورپی ممالک ایران سے مذاکرات میں تیزی لانے کے لیے پُرعزم ہیں، فرانسیسی صدر

فرانسیسی صدر ایمانوئل میکرون نے ہفتے کے روز کہا ہے کہ فرانس اور اس کے یورپی اتحادی ایران کے ساتھ مذاکرات کو تیز کریں گے، جو کہ اسلامی جمہوریہ ایران اور اسرائیل کے درمیان ایک ہفتے سے زائد جاری کشیدگی کے تناظر میں کیے جا رہے ہیں۔

جمعہ کے روز، برطانیہ، فرانس، جرمنی اور یورپی یونین کے اعلیٰ سفارت کاروں نے جنیوا میں ایرانی وزیر خارجہ عباس عراقچی سے ملاقات کی ہے، جو اسرائیلی بمباری کے آغاز کے ایک ہفتے بعد ہوئی۔

یورپی رہنماؤں نے ایران پر زور دیا ہے کہ وہ اپنے جوہری پروگرام پر امریکہ کے ساتھ سفارتی کوششوں کی بحالی کی جانب قدم بڑھائے، تاہم تہران نے واضح کیا کہ جب تک اسرائیل بمباری بند نہیں کرتا وہ سفارت کاری پر غور نہیں کر سکتا۔

ہفتے کے روز صدر میکرون نے کہا کہ تنازع کے دائرہ کار کو بڑھنے سے روکنے کے لیے مذاکرات میں تیزی لائی جائے گی۔

صدر ایمانوئل میکرون نے ایران کے صدر مسعود پزشکیاں سے ٹیلیفونک گفتگو کے بعد سوشل میڈیا پلیٹ فارم ”ایکس“ پر انگریزی میں اظہارِ خیال کرتے ہوئے کہا کہ مجھے یقین ہے کہ جنگ کے خاتمے اور مزید خطرناک صورتحال سے بچنے کا راستہ موجود ہے۔

انہوں نے مزید کہا کہ اسی مقصد کے لیے ہم فرانس اور اس کے یورپی شراکت داروں کی قیادت میں ایران سے مذاکرات کو تیز کریں گے۔

صدر میکرون نے ایک بار پھر زور دے کر کہا کہ ایران کو کبھی بھی جوہری ہتھیار حاصل کرنے کی اجازت نہیں دی جا سکتی۔ اور یہ بھی واضح کیا کہ یہ ایران کی ذمہ داری ہے کہ وہ دنیا کو مکمل اور قابلِ بھروسا یقین دہانیاں فراہم کرے کہ اس کے عزائم پرامن ہیں۔

صدر میکرون نے ایک بار پھر مطالبہ کیا کہ فرانسیسی شہری سیسل کوہلر اور جیک پیرس کو فوری رہا کیا جائے، جنہیں مئی 2022 سے ایران میں جاسوسی کے الزامات کے تحت قید رکھا گیا ہے، الزامات جنہیں ان کے اہلِ خانہ سختی سے مسترد کرتے ہیں۔

میکرون کا کہنا تھا کہ ان کی غیر انسانی قید سراسر ناانصافی ہے۔ میں توقع کرتا ہوں کہ وہ جلد از جلد فرانس واپس آئیں گے۔