امریکہ کا بھارتی شہریوں کو ویزہ مدت سے تجاوز کرنے پر ملک بدری اور سفری پابندی کا انتباہ

امریکہ نے ہفتے کو خبردار کیا ہے کہ اگر بھارتی شہری اپنے مقررہ وقت سے زیادہ قیام کریں گے تو انہیں ملک بدر کردیا جائے گا۔

امریکی سفارتخانے نے بھارت میں ایک بیان میں کہا کہ اگر آپ امریکہ میں اپنے ویزے کی مدت سے زیادہ رہتے ہیں تو آپ کو ملک بدر کیا جا سکتا ہے اور مستقبل میں امریکہ کا سفر کرنے پر مستقل پابندی بھی عائد کی سکتی ہے۔

واضح رہے کہ امریکی صدر ڈونلڈ ٹرمپ نے اپنے دوسرے دورِ صدارت میں لاکھوں غیر قانونی تارکین وطن کو ملک بدر کرنے کا عزم ظاہر کیا ہے ۔

گزشتہ ماہ رائٹرز نے رپورٹ کیا تھا کہ ٹرمپ انتظامیہ پاکستان اور کئی دیگر ممالک کے لیے امریکی ویزوں کے اجرا کو جزوی طور پر معطل کرنے پر غور کررہی ہے، اگر وہ 60 دن کے اندر اپنی کمزوریوں کو دور کرنے کے مؤثر اقدامات نہ کریں۔

تاہم ایک امریکی اہلکار نے نام نہ ظاہر کرنے کی شرط پر خبردار کیا کہ فہرست میں تبدیلیاں ہو سکتی ہیں اور یہ ابھی تک انتظامیہ، بشمول امریکی سیکریٹری آف اسٹیٹ مارکو روبیو کی حتمی منظوری سے قبل ہے۔

ٹرمپ کی ہدایت ان سخت امیگریشن اقدامات کا حصہ ہے جو انہوں نے اپنی دوسری مدت کے آغاز میں متعارف کروائے۔

انہوں نے اکتوبر 2023 میں ایک تقریر میں اپنے منصوبے کا خاکہ پیش کیا تھا اور وعدہ کیا تھا کہ غزہ پٹی، لیبیا، صومالیہ، شام، یمن اور ”کسی بھی ایسی جگہ سے جہاں ہماری سلامتی کو خطرہ ہو“ آنے والے افراد پر پابندی عائد کی جائے گی۔