فرانس میں ہنگاموں کے دوران مارسیئے فٹبال کلب کی آفیشل دکان لوٹ لی گئی

فرانس کے فٹبال کلب اولمپک مارسیئے نے کہا ہے کہ شہر کی تاریخی مرکزی شاہراہ لا کانیبیئر پر واقع اس کی سرکاری دکان ہفتے کے آخر میں ہونے والے ہنگاموں کے دوران لوٹ لی گئی۔ لیگ ون میں کھیلنے والے کلب نے اس واقعے کی شدید مذمت کی۔

فرانس میں ہفتے کے آخر میں کئی برسوں کے بدترین ہنگامے دیکھنے میں آئے، جہاں مہنگائی اور عوامی خدمات میں کمی کے خلاف احتجاج کے دوران ہزاروں افراد کو گرفتار کیا گیا جبکہ دکانوں کو لوٹا گیا یا نقصان پہنچایا گیا۔

پیر کو اس سے قبل مارسیئے کی انتظامیہ نے شہر میں پُرتشدد احتجاج اور لوٹ مار کے بعد عوامی اجتماعات اور مظاہروں پر پابندی عائد کردی۔ یہ پابندی دوپہر 12 بجے سے رات 8 بجے تک نافذ رہی۔

کلب نے اپنے بیان میں کہا کہ اولمپک مارسیئے لا کانیبیئر پر واقع اپنی سرکاری دکان کو نشانہ بنانے والے تشدد اور لوٹ مار کے واقعات کی سخت ترین الفاظ میں مذمت کرتا ہے۔ کلب نے دکان چلانے والے اپنے شراکت دار ادارے پوما سے بھی یکجہتی کا اظہار کیا۔