ایران کے ڈرون حملے کے خدشات، امریکا نے برطانیہ کے اڈے سے بمبار طیارے ہٹا دیے، امریکی حکام

ایران کی جانب سے برطانیہ کے ایک اہم فضائی اڈے پر پیچیدہ ڈرون حملے کی مبینہ سازش کے خدشے کے باعث امریکا نے وہاں موجود اپنے بی ون بمبار طیارے ہٹا لیے، امریکی حکام نے منگل کو رائٹرز کو بتایا۔ دونوں امریکی حکام نے نام ظاہر نہ کرنے کی شرط پر یہ معلومات فراہم کیں۔

ایران نے بمبار طیاروں کے لیے یورپ میں امریکا کے ترجیحی اڈے آر اے ایف فیئرفورڈ پر مبینہ سازش میں ملوث ہونے کی تردید کی ہے۔ برطانوی پولیس نے منگل کو بتایا کہ اس نے مشتبہ سازش کی تحقیقات کے سلسلے میں دہشت گردانہ کارروائیوں کی تیاری کے شبہے میں لندن سے 22 سالہ برطانوی شخص کو گرفتار کیا ہے۔

امریکی فوج کی یورپی کمان کے ترجمان نے تبصرے سے گریز کرتے ہوئے کہا، ’’انٹیلی جنس سے متعلق معاملات پر گفتگو مناسب نہیں اور ہم فورس کے تحفظ کے لیے کیے جانے والے مخصوص اقدامات پر بھی بات نہیں کریں گے۔‘‘

ترجمان نے کہا، ’’متعدد کارروائیوں کے دوران یہ ثابت ہوچکا ہے کہ امریکا کے بمبار طیارے، جن میں بی ون، بی ٹو اور بی 52 شامل ہیں، دنیا بھر میں کہیں بھی اور کسی بھی وقت انتہائی درستگی کے ساتھ حملہ کرنے کی صلاحیت رکھتے ہیں، جس میں براعظم امریکا سے روانہ ہوکر کارروائی کرنا اور واپس وہیں پہنچنا بھی شامل ہے۔‘‘