پیٹرول 6.88، ہائی اسپیڈ ڈیزل 5.62 روپے فی لیٹر مہنگا
- نئی قیمتیں جمعرات، 17 ستمبر کیلئے نافذ العمل رہیں گی
وفاقی حکومت نے پیٹرول کی قیمت میں 6.88 روپے فی لیٹر جبکہ ہائی اسپیڈ ڈیزل (ایچ ایس ڈی) کی قیمت میں 5.62 روپے فی لیٹر اضافہ کردیا، نئی قیمتیں جمعرات، 17 ستمبر 2026 کیلئے نافذ العمل رہیں گی۔
آئل اینڈ گیس ریگولیٹری اتھارٹی (اوگرا) کے نوٹیفکیشن کے مطابق پیٹرول کی نئی قیمت 391.22 روپے فی لیٹر جبکہ ہائی اسپیڈ ڈیزل کی قیمت 421.45 روپے فی لیٹر مقرر کردی گئی ہے۔
ریگولیٹر نے کہا کہ قیمتوں میں اضافے کی بنیادی وجہ عالمی سطح پر جاری غیر یقینی صورتحال کے باعث بین الاقوامی منڈی میں پیٹرول اور ڈیزل کی قیمتوں میں اضافہ ہے۔
اوگرا کے مطابق پیٹرولیم مصنوعات کی قیمتوں میں پلیٹس کی شرحوں، پریمیم اور دیگر متعلقہ عوامل میں تبدیلیوں کو بھی مدنظر رکھا گیا ہے۔
تازہ اضافے سے عالمی منڈی میں خام تیل اور پیٹرولیم مصنوعات کی بلند قیمتوں کے باعث صارفین اور کاروباری اداروں پر لاگت کا بوجھ مزید بڑھ جائے گا۔
گزشتہ جائزے میں حکومت نے پیٹرول کی قیمت 4.10 روپے اضافے کے بعد 384.34 روپے فی لیٹر جبکہ ہائی اسپیڈ ڈیزل کی قیمت 6.41 روپے اضافے کے بعد 415.83 روپے فی لیٹر کردی تھی۔
بدھ کو عالمی منڈی میں تیل کی قیمتیں کم ہوگئیں۔ سعودی عرب کی جانب سے عمان کے راستے ایشیائی ریفائنریوں کو مزید خام تیل کی کھیپیں فراہم کرنے کی اطلاعات نے مشرقِ وسطیٰ میں رسد میں خلل کے خدشات کسی حد تک کم کیے، جبکہ امریکی خام تیل کے ذخائر میں توقع سے کم کمی نے قیمتوں پر مزید دباؤ ڈالا۔
صبح 11 بج کر 23 منٹ (امریکی مشرقی وقت) تک برینٹ خام تیل کے سودے 3.63 ڈالر، یعنی 3.3 فیصد کمی کے بعد 105.12 ڈالر فی بیرل پر آگئے تھے، جبکہ امریکی ویسٹ ٹیکساس انٹرمیڈیٹ کے سودے 4.11 ڈالر، یعنی 3.9 فیصد کمی کے بعد 101.72 ڈالر فی بیرل پر تھے۔
معاملے سے واقف افراد نے بتایا کہ سعودی عرب عمان کی بندرگاہ صحار کے قریب جہاز سے جہاز میں منتقلی کے ذریعے ایشیائی ریفائنریوں کو خام تیل کی مزید کھیپیں فراہم کر رہا ہے، جس سے بحیرہ احمر تک جانے والی سعودی عرب کی ایسٹ ویسٹ پائپ لائن پر حملوں کے نتیجے میں عالمی رسد کو پہنچنے والے نقصان میں کسی حد تک کمی آئی ہے۔