اسٹاک ایکسچینج نے ایس ای کو 1.92 ارب روپے کے آئی پی او کی اجازت دے دی

ایس ای فروٹس اینڈ ویجیٹیبلز لمیٹڈ کو پاکستان اسٹاک ایکسچینج سے آئی پی او کی منظوری مل گئی ہے جس کے تحت کمپنی 1.2 ارب سے 1.92 ارب روپے تک سرمایہ حاصل کرے گی۔ یہ رقم ورکنگ کیپیٹل کی ضروریات پوری کرنے اور اپنی پروسیسنگ و برآمدی صلاحیتوں میں توسیع کے لیے استعمال کی جائے گی۔

کمپنی 3 کروڑ عام حصص پیش کرے گی جو آئی پی او کے بعد ادا شدہ سرمایہ کا 32.01 فیصد ہوں گے۔حصص کی فلور قیمت 40 روپے فی شیئر مقرر کی گئی ہے جبکہ بک بلڈنگ کے ذریعے یہ قیمت زیادہ سے زیادہ 64 روپے تک جا سکتی ہے۔

آئی پی او میں 75 فیصد شئیرز بک بلڈنگ جبکہ 25 فیصد عام عوام کے لیے مختص ہوں گے۔ ٹاپ لائن سیکیورٹیز اور گروتھ سیکیورٹیز اس آئی پی او کے لیڈ منیجرز ہیں۔

دوسری جانب سرگودھا میں قائم ایس سی فروٹس اینڈ ویجیٹیبلز 1998 سے کینو، آم اور آلو برآمد کر رہی ہے اور اس کی مصنوعات مشرق وسطیٰ،، جنوبی ایشیا اور وسطی ایشیا کی منڈیوں میں پہنچتی ہیں۔

واضح رہے کہ آئی پی او سے حاصل ہونے والی رقم میں سے تقریباً 940.2 ملین روپے ورکنگ کیپیٹل، 153.8 ملین روپے کولڈ چین و پروسیسنگ کی توسیع جبکہ باقی رقم بین الاقوامی دفاتر، ٹیکنالوجی اور سولر انرجی پر خرچ کی جائے گی۔

مالی سال 2026 میں کمپنی کی خالص آمدنی 2.133 ارب روپے رہی، جو سالانہ بنیاد پر 24 فیصد زیادہ ہے جبکہ بعد از ٹیکس منافع 303.8 ملین روپے کی ریکارڈ سطح پر پہنچ گیا۔ کمپنی مالی سال 2024 سے قرض سے پاک ہے۔