پاکستان کیبلز نے سی ای سی ایل کو 35 کروڑ روپے میں مکمل حصص واپس خریدنے کی منظوری دے دی
- لین دین تمام متعلقہ ریگولیٹری منظوریوں سے مشروط ہے
پاکستان کیبلز لمیٹڈ کے بورڈ نے چنائے انجینئرنگ اینڈ کنسٹرکشن (پرائیویٹ) لمیٹڈ میں اپنے 17 فیصد حصص تقریباً 35 کروڑ روپے میں سی ای سی ایل کو فروخت کرنے کی منظوری دے دی۔
پاکستان کیبلز لمیٹڈ نے جمعرات کو پاکستان اسٹاک ایکسچینج کو جاری کردہ نوٹس میں بتایا کہ کمپنی کے پاس سی ای سی ایل کے 48 لاکھ 45 ہزار عام حصص موجود ہیں، جن کی فی حصص مالیت 10 روپے ہے۔ یہ حصص سی ای سی ایل کے جاری اور ادا شدہ حصص کے 17 فیصد کے برابر ہیں۔
نوٹس کے مطابق سی ای سی ایل نے مذکورہ حصص تقریباً 72.24 روپے فی حصص کے حساب سے واپس خریدنے کی پیشکش کی ہے، جس کی مجموعی مالیت تقریباً 35 کروڑ روپے بنتی ہے۔
مجوزہ لین دین تمام ضروری کارپوریٹ، ریگولیٹری، شیئر ہولڈرز اور دیگر متعلقہ منظوریوں کے حصول کے ساتھ ساتھ ضروری دستاویزات اور قانونی کارروائی مکمل کرنے سے مشروط ہوگا۔
کمپنی نے مزید بتایا کہ مجوزہ بائی بیک مکمل ہونے کے بعد پاکستان کیبلز کے پاس سی ای سی ایل کا کوئی حصص باقی نہیں رہے گا۔
نوٹس کے مطابق مجوزہ لین دین سے متعلق کسی بھی اہم پیش رفت کی صورت میں کمپنی قابلِ اطلاق قوانین اور ضوابط کے تحت مزید معلومات فراہم کرے گی۔
پاکستان کیبلز لمیٹڈ 1953 میں پاکستان میں ایک نجی لمیٹڈ کمپنی کے طور پر قائم ہوئی تھی اور 1955 میں اسے پبلک لمیٹڈ کمپنی میں تبدیل کردیا گیا۔
کمپنی کی بنیادی سرگرمیوں میں تانبے کی راڈز، تاروں، کیبلز اور کنڈکٹرز، ایلومینیم ایکسٹروژن پروفائلز اور پی وی سی کمپاؤنڈز کی تیاری اور فروخت شامل ہے۔