گل کو اب بھی بھارت کے ورلڈ ٹیسٹ چیمپئن شپ فائنل میں پہنچنے کی امید، ڈی سلوا نے سری لنکا کے تین کھلاڑیوں کو سراہا

بھارت کے کپتان شبمن گل کو جمعرات کو سری لنکا کے ہاتھوں سیریز میں کلین سویپ سے محروم ہونے کے باوجود اب بھی امید ہے کہ ان کی ٹیم ورلڈ ٹیسٹ چیمپئن شپ کے فائنل میں جگہ بنا سکتی ہے۔

بھارت 2-0 سے سیریز جیتنے کی پوزیشن میں نظر آرہا تھا، تاہم مڈل آرڈر بلے باز سونل دنوشا کی شاندار مزاحمت کے باعث سری لنکا نے میچ ڈرا کرادیا۔

ورلڈ ٹیسٹ چیمپئن شپ کی پوائنٹس ٹیبل پر اس وقت پانچویں نمبر پر موجود بھارت رواں سال کے آخر میں دو ٹیسٹ میچوں کے لیے نیوزی لینڈ کا دورہ کرے گا، جس کے بعد 2027 کے آغاز میں آسٹریلیا کے خلاف پانچ ٹیسٹ میچوں کی اہم سیریز کی میزبانی کرے گا۔

گل نے تقریبِ تقسیمِ انعامات میں کہا، ’’ہم نومبر میں نیوزی لینڈ جا رہے ہیں، یہ ہمارے لیے اچھی سیریز ہوگی، اس کے بعد ہماری اپنی سرزمین پر بھی ایک اچھی سیریز ہے۔‘‘

انہوں نے کہا، ’’اگر نیوزی لینڈ کے خلاف ہماری سیریز اچھی رہتی ہے اور ہمارے پاس موقع برقرار رہتا ہے تو ہم امید نہیں چھوڑیں گے۔ امید ہے ہم ڈبلیو ٹی سی فائنل میں پہنچ جائیں گے۔‘‘

ورلڈ ٹیسٹ چیمپئن شپ کی ٹاپ دو ٹیموں میں جگہ بنانے کے لیے بھارت کے پاس غلطی کی بہت کم گنجائش ہے۔ باقی سات ٹیسٹ میچوں میں اسے اپنی قسمت کا فیصلہ خود کرنے کے لیے کم از کم چھ میں کامیابی حاصل کرنا ہوگی۔

بھارت نے اپنی پہلی اننگز 9 وکٹوں پر 503 رنز بناکر ڈکلیئر کردی تھی، جس کے بعد اس نے سری لنکا کو 290 رنز پر آؤٹ کرکے فالو آن کرایا۔

تاہم دوسری اننگز میں بھارتی بولرز پہلی اننگز جیسی مؤثر کارکردگی نہ دکھا سکے اور دنوشا کی جانب سے میچ میں دوسری سنچری اسکور کیے جانے کے بعد بھارت کو ڈرا پر اکتفا کرنا پڑا۔

گل نے کہا، ’’اب پیچھے مڑ کر دیکھیں تو یہ سوال کیا جاسکتا ہے کہ فالو آن کرانے کا فیصلہ درست تھا یا نہیں؟ موسم کو دیکھتے ہوئے ہمیں یقین نہیں تھا کہ پانچویں دن پورا کھیل ہوسکے گا۔‘‘

انہوں نے مزید کہا، ’’بعد میں ان باتوں پر بحث کی جاسکتی ہے، لیکن اس وقت آپ وہ بہترین فیصلہ کرنے کی کوشش کرتے ہیں جو آپ کو درست لگتا ہے۔ کچھ چیزیں ہمارے حق میں نہیں گئیں، لیکن یہ ایک شاندار میچ تھا اور میرے خیال میں آج ٹیسٹ کرکٹ کی جیت ہوئی ہے۔‘‘

سری لنکا کے کپتان دھننجایا ڈی سلوا نے بلے بازوں سونل دنوشا اور پسندو سوریابندارا کے ساتھ ساتھ آل راؤنڈر کیشارا نوانتھا کی کارکردگی کو سراہا۔

انہوں نے کہا، ’’یہ سب سری لنکا کی کرکٹ کے مستقبل کے لیے باصلاحیت کھلاڑی تلاش کرنے کے بارے میں ہے۔ میں سلیکٹرز اور کوچ کا شکر گزار ہوں جنہوں نے نوجوان کھلاڑیوں کو موقع دینے اور انہیں ملک کے لیے اپنا کردار ادا کرنے کا موقع فراہم کیا۔‘‘